أحمد شبكة: حرصوا منهم
فكرك مين دول؟
إعلامي علي وزن “ناموسه”
يجيبوه للناس المفروسه
فينططهم ويشحططهم
ويجيب لك فيديو بغلطاتهم
طيب هتفيدنا بحاجة يا بيه؟
لأ بس ابوّظ في خططهم
إعلامي علي وزن “الشاشة”
ولا ليه ف حضور و لا في بشاشة
كل اللي يهمّه يفوّقنا
م الغول الناوي يروّقنا
يشتم و يزعق و يهلل
و يدردر بحياه و يفلقنا
إعلامي علي وزن “يا سيدي”
حاوي و متدرّب علي إيدي
مره يحلل مره مثقّف
مره ينظّر مره يصقّف
لو ع التليفون: هيدوس جامد
لو قدّامه تلاقيه وقّف
إعلامي وزنه “علي حجري”
اوّل ماتشوفه اطلع اجري
ماهو عارف سرّك و اسرارهم
و ان مره احتاجوا يبررهم
و ان مره اتزنقوا يحررهم
و ان يوم احتاس هيكررهم
إعلامي وزنه “يا خراشي”
هيجيب المرتشي و الراشي
مايهمش مين مظلوم فيهم
الهمّ انها تفضل والعة
و ان طفّوها يولّع فيهم
بس مشاهدته تفضل طالعه
إعلامي وزنه “عمي حيثي”
احاسيسه بتجرح احاسيسي
هيقطّع قلبك من جوّه
و يخلليك تشعر بمروّه
مايهمش يعرض جرح الناس
و ينزّل دمعك بالقوّه
عارفينهم؟
طب حرّصوا منهم