نجوى إبراهيم: التفاهة مهمة وتنمي القدرات
تحدثت الإعلامية نجوى إبراهيم، عن معنى مصطلح التفاهة ودوره في حياة الفرد، موضحة أنه ينمي عملية الإبداع.
قالت “إبراهيم” خلال حلقة جديدة من برنامج “بيت العز” المذاع عبر إذاعة “نجوم إف إم”، أن هناك أهمية للتفاهة والبعد عن الجدية مضيفة: “أوعى تصدق اللي يقولك أنت قاعد طول النهار على السوشيال ميديا.. كده عيب عليك ميصحش.. قال أنت يعني لما تقفل التلفيزيون والكتب وكل حاجة بتهيص بيها هتخصب اليورانيوم، لأ خالص”.
نرشح لك: أبطال “الحجرة”: العمل نفسي درامي لا يناقش الجريمة ولا يبحث عن مبررات
أضافت: “التفاهة طبعا ليها وقتها يعني إيه تفاهة يعني الحاجة اللي مش مهمة طيب إزاي أنا بقول أنها مهمة في تناقد في الكلام!”.
تابعت: “لما تبقى لطيف وتعدي الأمور وتتعامل بلطف هتبص تلاقي نفسك علاقاتك الاجتماعية بقت منورة وعندك أصحاب كتير.. الناس اللي بتقعد على القهوة مش بتقعد من فراغ، هي بتروح تمسح دماغها خالص علشان تتكلم في أي حاجة”.
أوضحت : “جرب تروح القهوة وتسأل أسئلة غريبة وفلسفية وعميقة.. مين اللي هيقعد يسمع الكلام ده!.. أنت تقول له روح اتفرج على القطط والكلاب وناشونال جرافيك، في حاجات هتقدر تاخد منها معلومات وفي نفس الوقت أنت مبسوط هتلاقي بعد كده أنك نميت قدراتك “.
أشارت: “الشخص أحادي التفكير اللي علطول مكشر وواخد الأمور جد وقاعد جنب أرسطو.. لازم تبقى الناحية التانية بتروح رحلة بتقعد مع صحابك بتقول كلام لذيذ.. لازم يبقى عندك النقطتين دول”.
استكملت: “دايما الأصحاب بعد شوية تلاقيهم بينفروا من الجدية.. لو اتفرجت على انشتيان صاحب نظرية النسبية هتلاقي كل صوره مطلع لسانه وناكش شعره.. هو بيعمل حاجات بتريحه وبيمد بها خط بينه وبين اللي قدامه “.