تامر أمين ينتقد تجاهل عيد الأب: ليه كرامتنا متداسة؟
علق الإعلامي تامر أمين على تجاهل الاحتفال بعيد الأب، الذي يوافق 21 يونيو، موضحاً أنه لا أحد يتذكر هذا اليوم مثل عيد الأم.
أضاف أمين خلال حلقة الاثنين من برنامجه “آخر النهار”، على قناة النهار، أنه كأب منزعج من ذلك التجاهل، قائلا: “مش مبسوط ومش مرتاح لأن حاسس إن إحنا كآباء قيمتنا مش متقدرة، وأهميتنا مش متشافة ودورنا مش محسوس.. حتى كلمة شكرا مبنسمعهاش”.
تابع: “نحن الآباء ليه كرامتنا متداسة أوي كده.. ليه أفضالنا منسية.. محدش يقولي أصل الأم ليها فضل، مفيش مقارنة أصلا، إحنا مكملين لبعض.. ومش عايز اتساوى بالأم لأني عارف قدرها كويس، بس أنا كأب ليا دور”.
وأضاف: “معتقدش إن في تلاتة من حضراتكم عارفين إن بعد بكرا هو عيد الأب.. اليوم ده بيعدي ولا أي حاجة بتحصل.. يكفي حتى يتقال كل سنة وانت طيب، مش هنقول هات هدية أو حاجة”.
وطالب تامر أمين بالإحسان للأب كما هو الحال مع الأم، امتثالا لأوامر الله، قائلا: “ربنا قال (وبالوالدين إحسانا).. ليه الإحسان كله بيروح للأم بس؟ ليه الأب منسي ومش متقدر ومش متشاف؟ حتى كلمة شكرا مبيسمعهاش.. ليه منسيين وكرامتنا متداسة أوي كده؟! أراهن إن كان في 3 منكم فاكرين عيد الأب أو بيحتفلوا بيه”.