أبرزها عن كواليس "تحت الوصاية".. ملخص تصريحات دياب في "صاحبة السعادة"
حل الفنان دياب ضيفا على برنامج “صاحبة السعادة” مع الفنانة إسعاد يونس، المذاع عبر شاشة dmc، مساء أمس الاثنين.
تحدث “دياب” خلال الحلقة عن كواليس مسلسل “تحت الوصاية”، ورأيه في شخصية “صالح” التي قدمها بالمسلسل وصعوبات التصوير، مرورا بعلاقته بزوجته هاجر الإبياري وغيرها من المواضيع.
نرشح لك: دياب: منى زكي إيدها اتكسرت في تصوير “تحت الوصاية”
وفيما يلي نستعرض أبرز تصريحات دياب خلال لقائه مع “صاحبة السعادة”:
١- “أنا مش كائن بحري خالص ومبحبش العوم، وفجأة بقى مطلوب مني أعمل دور ريس مركب، ربنا نجدني أن مكنش عندي مشاهد صيد، بس طول الوقت بتكلم إني ريس مركب، وأول ما وقفت على رصيف البلد دي حسيت إني واحد من الناس دي”.
٢- “منى زكي إيدها اتكسرت وإحنا بنصور تحت الوصاية، وكملت وقعت وإحنا بتعمل بروفة وتحاملت، بدأت إيدها تورم وكملت، أنا شوفت رجالة مبيعملوش كده، دراعها ورم وخدت مسكن وكملت اليوم ومحسستش حد بحاجة، واليوم كان صعب جدا والجو صعب في المياه”.
٣- “أنا كبني آدم مش متصنف شرير.. متصنف أهبل، بس لما بتعصب ببقى وحش جدا، ووشي بيقلب وعنيا بتحمر، إحنا بشر، لما يبقى علينا ضغوط بنقوم بأفعال مينفعش نقوم بيها في العادي”.
٤- “أنا مش شايف إن شخصية صالح شريرة خالص ولا بكرهه كبني آدم، هو جواه خير وجواه شر ولما وقع تحت ضغوط من حواليه اضطر يلجأ لأفعال الشر.. ممكن يعمل أفعال شرسة جدا بس مش شيطان بردو”.
٥- بكيت خلال مشاهدتي لمشهد النهاية بين صالح وحنان في “تحت الوصاية، لحزني على انتهاء رحلتي مع المسلسل وشخصياته وحزني على نهاية شخصية صالح نفسها.
٦- أغنية غمازات كانت وش الخير عليا رغم استغرابي للأغنية في البداية، ورغم إني فضلت 5 سنين مشتغلش وعمري ما فقدت الأمل.
٧- “أنا برفس وأنا نايم ومراتي مظلومة معايا ظلم مش طبيعي وأنا ما ينفعش أنام في السرير محتاج أنام في الإستاد”.
٨- “أنا خايف أقتل مراتي قتل خطأ وأنا نايم بسبب الرفس، ومحتاج عالم يفسر لي المشكلة دي، أنا ساعات بضرب وأشتم وأنا نايم وهي بتفضل تسألني مين الناس اللي كنت بتشتمهم دول أقول لها دول أصحاب المواقف اللى عصبتني”.
٩- “أنا بعتبر هاجر مراتي انها بنتي، وأنا بحبها عشان كده فكرة إنها تنام زعلانة دي مش موجودة في قاموسي.. حرام تنام زعلانة أصلا، وجودها في حياتي فرق معايا على الصعيد المهني جدا، وعلى الصعيد الشخصي هي إنسانة جميلة وقلبها حلو وطيبة وأكتر حد صريح قابلته من يوم ما اتولدت.. ربنا يباركلي فيها ويقدرني أخليها مبسوطة”.
١٠- زوجتي كاتبة ومؤلفة ممتازة ستبدأ أعمالها في الخروج للنور قريبا، كما أنها مدربة تمثيل جيدة وعادة ما تعطيني نصائح وتعليقات على أدائي كممثل تحسن من مستواي الفني بدرجة كبيرة في كل عمل.
يشار إلى أن دياب شارك مؤخرا في مسلسل “تحت الوصاية” تأليف خالد وشيرين دياب، وإخراج محمد شاكر خضير وإنتاج ميديا هب سعدى – جوهر، وبطولة منى زكي، دياب، نهى عابدين، أحمد خالد صالح، رشدى الشامى، على الطيب، مها نصار، خالد كمال، ثراء جبيل، محمد عبد العظيم، أحمد عبد الحميد وعدد آخر من الفنانين، ويناقش العمل قانون الوصاية بعد وفاة الأب أو الزوج.