أسامة منير يتحدث عن مساوىء بيت العيلة
قال الإعلامي أسامة منير، إن السكن في بيت العائلة هو من أكبر الأزمات التي يواجهها الشباب عند إقبالهم على الزواج، موضحا أن هذه الفكرة نابعة من ثقافة العزوة.
أضاف “منير” خلال مقطع فيديو نشره عبر حسابه الرسمي على موقع تبادل الصور والفيديوهات “إنستجرام”: “من أكبر الأزمات اللي بتواجه الناس دلوقت أن كتير أوي من الناس عندهم ثقافة بيت العيلة، أن أنا رجل مقتدر وباني بيت أيا كان في القاهرة أو في الأرياف أخد شقة وابني شقة وبنتي شقة ونبقى بيت عيلة ملمومين”.
نرشح لك: نصائح أسامة منير لعلاقة حب ناجحة
تابع: “الثقافة دي جاية من إني عايز عيالي حواليا وعايز عزوة، ثقافة العزوة دي موديانا في 300 داهية، لأن الست بتتجوز في بيت عيلة بتواجه حما وأخوات جوزها ومراتات أخوات جوزها وده بيدخل في حياة ده ودي بتخش في حياة دي وده يتحكم في ده، وأخوه يرزعها كلمتين مالهومش لازمة وأخته تتخانق معها”.
أوضح: “وتحس أنها مقهورة، وأنها بقت عضوة في وسط جيش هي مالهاش فيه أساسا، ومن هنا بتبدأ المشاكل.. كل الفكرة جاية من إني بحب العزوة واللمة وولادي حواليا وإحنا بيت العيلة.. أنتوا بتأذوا عيالكم لما بتلموهم حواليكم بالشكل ده”.
ناصحا: “ادوا لكل عيل من عيالكم الحرية أن هو يسكن ويعيش براحته، يحكم في بيته براحته، يشارك براحته زوجته حياتهم الزوجية، ابعدوا عنهم وخليهم يعيشوا زي ما أنتوا عيشتوا”.
View this post on Instagram