أمير كرارة: قلدنا "بيكي بلايندرز" في "سوق الكانتو"
قال الفنان أمير كرارة، إنهم قلدوا المسلسل البريطاني “بيكي بلايندرز” في مسلسل “سوق الكانتو”، الذي عرض في السباق الرمضاني الماضي، موضحا أنه لا يكره مواقع التواصل الاجتماعي بسبب سب بعض الناس للفنانين.
أضاف “كرارة” خلال لقائه في برنامج “الراديو بيضحك” المذاع عبر إذاعة “الراديو 9090”: “الناس كانت بتقول على (سوق الكانتو) هما بيقلدوا (بيكي بلايندرز) آه بنقلده، أنا صريح جدا، أنا قولت لحسين المنباوي أنا هموت وأعمل المسلسل ده، أنا بعترف، بنقلد إيه المشكلة؟ ما نعمل حاجة شبهه ما هو زمن مكنش في مصر ساعتها يعني، حرب كرموز كان نفس الزمن بس حدوتة تانية”.
نرشح لك: في عيد الأضحى.. أمير كرارة وأبطال “البعبع” ضيوف “معكم منى الشاذلي”
أشار: “لما عملنا البعبع قال لك بيقلد فان ديزل، ده فان ديزل بقاله 20 سنة بيطلع بالفنلة البيضة والبنطلون الجينز، اشمعنى هناك مكسر الدنيا؟ يا جماعة مشوا الدنيا ماتحبكوهاش، اتبسطوا حتي لو بنقلد برا ما برا بيقلدوا”.
أوضح: “مفيش حد هينجح طول عمره بس في حاجة اسمها عمل يشفع لك ممكن أكون عملت منسي وبعدها عملت حاجة الناس محبتهاش أفتكر السنة اللي قبلها ما أنا كنت باسطك، متقساش متخشش تشتم، في ناس تبقى قاعدة ورا الشاشة تشتم ولو شافك في الشارع يجري عليك عشان يتصور معاك، في ناس قاسية في الردود والتعامل”.
أردف: “أنا بكره السوشيال ميديا، والرقم اللي عندي عليها حقيقي، وبزعل أوي من الناس اللي بتخش تشتم في الممثلين ليه ما تسكت استفدت إيه لما شتمتهم إيه اللي حصل يعني في ممثلين بيردوا ويشتموا أنا بدخل أتفرج وأضحك”.
فيما وجه” كرارة” للأشخاص الذين يسبون الفنانين عبر مواقع التواصل الاجتماعي: “رسالة للناس اللي بتخش تشتم ممثل فكر في ابني الصغير اللي شايف أبوه أحسن حد في الدنيا يلاقي أبوه مشتوم هيزعل أوي، حط نفسك مكانا، في الآخر ده شغلنا وأكل عيشنا، مش مبسوط مننا عندك في مليون نجم أتفرج عليه، وفي الآخر هنشتغل برضو”.