ضرب وإهانة.. بوسي: عملت في شارع الهرم بالإكراه
أكدت المطربة بوسي، ندمها على العمل في شارع الهرم خلال فترة مبكرة في بداية حياتها الفنية.
قالت “بوسي”خلال حوارها مع الإعلامية أسما ابراهيم في برنامج”حبر سري” المذاع عبر شاشة “القاهرة والناس”، إنه بالرغم من ندمها على العمل في هذه الأماكن إلا أنها أضافت لها ميزة واحدة وهي إكسابها الخبرة في التعامل مع الأخرين.
نرشح لك: بوسي: عرفت وفاة أبويا بعدها بيومين
أوضحت: “مقولتش شغلي في شارع الهرم تنازل ولكن ندمانه عليه، هو في ميزة واحدة علمني اتعامل مع الناس وخلاني عندي خبرة في التعامل.. بصراحة مكنتش حابه أكون موجودة واشتغل في الاماكن دي، حاجة متعبنيش، بس مش شبهي”.
أضافت: “شوفت فيها حاجات كتير مش لازم أقولها، ملاهي ليلية عايزة يحصل فيها إيه!.. بس أنا كنت عيلة صغيرة وبأكل عيش مش أكتر”.
تابعت أنها لم تكن ترغب في الاستمرار في هذا العمل ولكنها كانت مجبرة على ذلك، موضحة: “مكنتش عايزة استمر فيها، بس في بقى اللي بيخليكي تستمري وفي اللي جبرك على الشغلانة، أنتي مش شغالة بمزاجك شغالة غصب عنك وبالإكراه”.
أشارت إلى أنها تعرضت للضرب والإهانة من أجل الاستمرار في هذه المهنة، مضيفة: “اضربت عشان انزل الشغل، خناق وضرب وإهانة، فعايزاني أحب الشغلانة دي ليه! إذا كنت بشتغلها غصب عني وبروحها إجبار”.
أكدت: “عانيت كتير، والحمد لله إني لسه فيا شوية عقل بعد اللي أنا شوفته في حياتي، لو وحدة غيري وشافت اللي أنا شوفته كانت فاتها لسعت أو ماشية على الله في الشوارع أو مكاني في مستشفى المجانين”.