مجدي الهواري يكشف تفاصيل المكالمة الأخيرة لـ علاء ولي الدين
كشف المخرج مجدي الهواري، تفاصيل الحوار الذي دار بينه وبين الفنان الراحل علاء ولي الدين، في المكالمة الأخيرة التي جمعت بينهما.
كتب “الهواري” عبر حسابه على موقع “فيسبوك”: “وكأنه امبارح! زي النهارده من عشرين سنة مات صديق عمري علاء ولي الدين، الله يرحمه، وما زلت في انتظار مكالمة إلى الآن.. قمت يومها من النوم أول يوم العيد على الخبر الصادم كنت نايم وكأنه امبارح! كان صوته قبل ما أنام آخر حاجة سمعتها يومها!”.
تابع: “آخر جملة قالها يا مجدي.. محتاج أنام أنا راجع من رحلة طويلة ومتعبة، عايز أشوفك أحكيلك، هصحى من النوم على صلاة العيد أضحي وأكلمك، واشوفك انت وحشني جدا ولو صاحي خدني نتفرج على فيلمك الجديد في البدري أول حفلة زي ما بنعمل.. الفيلم كان (ميدو مشاكل) طبعا ودي كانت طقوس بنعملها دائما أنا وهو في كل فيلم ينزل ندخل حفلة 10 صباحاً في الروقان! وقالي ونكلم أحمد عبد الله وأحمد حلمي علشان ابارك لهم وكمان نكلم شيرين اه ياليل وقعدنا نضحك جامد جداً في التليفون، ويحكيلي عن كواليس تصويره في البرازيل فيلمه الجديد (بالعربي تعريفة) إخراج عمرو عرفة وإنتاج طارق صيام وقالي قد ايه تعب في التصوير هناك ويحكيلي إن الشغل طالع حلو والرحلة الطويلة اللي كان نفسه يطلب فيها مرة واحدة بس (مربة فراولة) من الفندق بس مكنش عارف اسمها ايه بالبرازيلي، وانه قد ايه مفتقد كواليس شغلنا مع بعض!”.
أضاف: “طبعاً لأن ده كان أول فيلم يعمله مع منتج تاني بعد عبود والناظر وابن عز اللي كان حظي حلو إني اعمله أهم ثلاث أفلام حياته والبطولة المطلقة، ده غير فوازير أبيض وأسود الجزء التاني طبعاً، وقمت من النوم عرفت انه توفي بعد ما ضحى وعمل كل الخير واطمن علي امه واخواته.. وفضلت مش مصدق كتير ولا عايز أصدق ويومها نزل الفيلم ميدو مشاكل أول حفلة اللي مفروض نروحها سوا ونجح وجاب أعلى إيراد يوم في تاريخ السينما في أفلام العيد، وبقت الناس تكلمني تقولي البقاء الله في صديقك علاء ولي الدين، والف مبروك على فيلم ميدو مشاكل لأحمد حلمي”.
اختتم: “ومكنتش الحقيقة برد على الأولى ولا التانية! كنت مذهول! وفضلت والله في الحالة ديه كتير، وفضلت انتظر انه يقوم من النوم ويكلمني زي ما وعدني من يومها، الله يرحمه ويحسن اليه”.
يشار إلى أن فيلم “ميدو مشاكل” تم إنتاجه عام 2003، وهو بطولة أحمد حلمي، شيرين عبد الوهاب، محمد لطفي، رامز جلال، نشوى مصطفى، وإخراج محمد النجار، وتأليف أحمد عبد الله.