مكنتش أعرف أن صوتي حلو.. مي فاروق تكشف عن بدايتها في الغناء
كشفت الفنانة مي فاروق، عن بدايتها في الغناء، موضحة أنها لم تكن تعلم أنها صوتها جيد عندما كانت طفلة، لافتة إلى أن والدها هو من اكتشف موهبتها في الغناء.
أضافت “فاروق” خلال لقائها في برنامج “أنغام” المذاع عبر شاشة “dmc”: “والدي صوتي حلو وودنه حلوة جدا لاحظ إني عندي حاجة، قال لي تعالي نتمرن على أغاني بجد، سمعني ليلى مراد وفايزة أحمد وأنا عندي 8 سنين، والموضوع ده بالنسبة لأي طفل تقيل ومش مفهوم ابتديت أحفظ الأغاني بتاعتهم وأذاكرها وأقعد اسمعها”.
نرشح لك: مي فاروق: المسرح هو أكتر مكان بحس فيه بالسعادة
أشارت: “شوفنا في يوم إعلام لأطفال في كورال الأوبرا، بابا قال يلا نوديها تتبسط وتضيع وقتها في حاجة مفيدة قدمت مع المايسترو سليم سحاب، وابتديت أتمرن مع الكورال، وكنا بنتمرن على حاجات صعبة وتقيلة”.
تابعت: “عدت الأيام ولقيت نفسي بقف على مسرح دار الأوبرا وأنا طفلة، وفي كورال كبير، ده تقريبا كان أكبر جيل، وكنت من المحظوظين إني مشيت في الحتة دي واتمرنت ووقفت على المسرح وابتديت من هنا شوية ناس تعرفني من اللي جوا الفن”.
View this post on Instagram
في نفس السياق، قالت الفنانة مي فاروق، إنها لم ترى نفسها في مكان غير المسرح، موضحة أن المسرح هو أكثر مكان تشعر بالسعادة فيه.
أضافت “فاروق” خلال لقائها في برنامج “أنغام” المذاع عبر شاشة “dmc”: “أنا حسيت أنه مينفعش أقف غير على المسرح، ده أكتر مكان أنا فرحانة وأنا موجودة فيه وأكتر مكان يليق لي، معرفش أعمل حاجة تانية غير دي”.
أشارت: “أكتر مكان بحس فيه بمعنى السعادة هو المسرح، ولحد دلوقتي عندي رهبة وتوتر وخوف من المسرح، وببقى مخضوضة وخايفة ومترددة، واللي حواليا مش مقتنعين إني لحد دلوقتي بخاف”.
أما عن اختيار أغانيها قالت “فاروق”: “بختار اللي يليق لي وأحسه، الكلمة اللي أحس أنها حلوة أو هتليق عليا لو قلت كده، اللحن اللي محسوش غريب عليا، وأبقى مبسوطة وأنا بغنيه، مش أي حاجة طالعة جديدة أجرب أعملها”.