تامر هجرس: الفن بقى تجارة أكتر من أنه رسالة

قال الفنان تامر هجرس، إن الفن أصبح تجارة ولم يعد رسالة تعلم الجمهور، موضحا أنه يتمنى تقديم عمل تاريخي، ولكن هذا الأمر يتطلب منتج جريء، لافتا إلى أنه يرفض الكثير من الأعمال لأنها لا تناسبه.

أضاف “هجرس” خلال لقائه في برنامج “أسرار النجوم” المذاع عبر راديو “نجوم إف إم”: “المنتجين لما بييجوا لي عايزين يعملوا فيلم بحس أنه فليم بلا لازمة مش هيضيف حاجة فبقول له يا فلان أنت هتنتج وهتدفع أعمل حاجة تعيش وممكن تبقى بسيطة وتكلفك نص التمن”.

نرشح لك: شاهد.. غناء صفاء أبو السعود للمقطع المحذوف من “أهلا بالعيد”

أشار: “الفن بقى تجارة أكتر من أنه رسالة، المفروض أن هو يبقى لتعليم الجمهور، أو تعمل حاجة مختلفة خارج الصندوق وتحس الناس مستغربة الفيلم بس يتعلموا أنهم يتفرجوا على النوع ده، ومستقبلا يكمل ويبقى ناجح جدا، وبعد كده يحقق إيرادات”.

أما عن العمل الذي يتمنى تقديمه، أوضح: “أنا نفسي أعمل فيلم تاريخي، بس حاجة أفتخر بيها، زي مثلا (الرسالة) أو (صلاح الدين)، عندنا قصص كتير، وحاجات كتير ممكن نعملها بس هي عايزة المنتج الجريء، والمخرج المختلف، والكاتب اللي يخترع”.

تابع: “كل مخرج لازم يقولي أنت هتعمل حاجة معملتهاش خالص، أنا عايز تامر هجرس يبان للجمهور بشكل جديد، الكلمتين دول بتوع المخرجين، أنا نفسي أعمل حاجات مختلفة بس اللي يعرف معنى الممثل، الممثل له طبقات وألوان مختلفة، فلازم أي حد يغامر، لكن إحنا بطلنا نغامر، وطلعنا معنى الفن من الفن”.

وعن سبب غيابه عن الساحة الفنية لفترات طويلة، قال: “أنا بغيب عشان الحاجات اللي بتيجي لي مش هتبقى إضافة ليا، فأركز إني سنة أعمل فيلم، وسنة مسلسل،وسنة إعلان، بحاول أبقى موجود كل سنة، بس لو أتعرض عليا حاجات حلوة هتلاقيني بظهر أكتر”.

يشار إلى أن آخر أعمال الفنان تامر هجرس فيلم “شوجو دادي”، وتدور أحداثه في إطار كوميدي حول رجل يمر بأزمة منتصف العمر، ويعيش حالة مراهقة متأخرة، الأمر الذي يقوده إلى إقامة علاقة سرية مع راقصة، فتنقلب حياته وحياة أسرته رأسا على عقب.

فيلم “شوجر دادي” من بطولة ليلى علوي، بيومي فؤاد، وحمدي الميرغني، ويشاركهم البطولة تامر هجرس، محمد محمود، مصطفى غريب، مي الغيطي، جوهرة، وفرح الزاهد، تأليف لؤي السيد، وإنتاج نيوسينشري، وإخراج محمود كريم، وشارك في إنتاجه شركات أفلام مصر العالمية، سينرجي، ماجيك بينز، وفيلم سكوير.