رامي صبري يرد على اتهام عمرو مصطفى بالسرقة

رد الفنان رامي صبري، على اتهام الملحن عمرو مصطفى له بسرقة لحن أغنية “يمكن خير”، من أغنيته “رقصة”، موضحا أنه فنان مبدع والمبدع الحقيقي لا يسرق، لافتا إلى أن هناك ما يسمى بتوارد أفكار وهذا ما حدث في لحن أغنية “يمكن خير”.

أضاف “صبري” خلال لقائه في “أجمد 7” المذاع عبر راديو “نجوم إف إم“: “أنا مبحبش اتكلم عن زملاء بشكل سلبي، وعمرو مصطفى المفروض أنه صديق وعشرة، وأنا مش هتكلم بطريقته لأن طريقته معجبتنيش، هو قال إني سرقت وأعتقد أن رامي صبري مش هيسرق المفروض إني فنان والفنان المبدع مبيسرقش حاجة في حاجة اسمها توارد أفكار بمعنى، إني ممكن أجيب 10 ألحان في منهم جملة شبه التانية”.

نرشح لك: عمرو مصطفى: ويجز يشتري توزيع ألحان جاهزة من أحد التطبيقات

أشار: “أنا زمان عملت أغنية لعامر منيب الله يرحمه، بعدها بسنة عمرو دياب عمل أغنية شبه الأغنية دي، ساعتها مطلعتش قولت أنا هتخانق مع الملحن محمد يحيى أو هرفع عليه قضية، أو الكلام الكبير اللي عمرو مصطفى قاله ده، ده كلام يدينه، عيب أنه يطلع يتكلم على فنان تاني بشكل مش حلو، مشكلة عمرو مصطفى مش أغاني، لأن لو حد فينا سرق من عمرو مصطفى حاجة هيقاضيه، هو خريج كلية حقوق وأنا معهد موسيقى عربي، قسم تأليف موسيقي، لما تتكلم على متخصص وأنت كلية حقوق، لازم تعرف أنت بتتكلم على مين”.

أوضح: “أنا بحب أطلع أضحك وأهزر مع الناس، مبحبش طريقة الخناقات والحاجات دي، ومش هرد عليه بطريقته هقوله ربنا يهديك، ركز في شغلك أكتر، إنما تقول ده سرق، كلام عيب يطلع من فنان كبير زيك.. عمرو مصطفى لما بيغير من نجاح بيطلع يخبط في الناس، مفيش حد فينا عاجبه خالص كلنا واقعين، وكلنا مبنعملش أغاني حلوة، وأغانينا مسروقة منه”.

أردف: “نفسي عمرو مصطفى يركز بجد، لأنه فنان بجد وموهوب جدا، وناس كتير نجحوا بسبب أغاني عمرو مصطفى وهو نجح بسبب أنه أشتغل معاهم.. متقعدش تخبط في الناس كلها وتخلي الناس كلها أعدائك، أنا اتضايقت منه جدا، لأني مبحبش التقليل من قيمة الناس، أنا راجل لو عندي مشاكل نفسية مكنتش خليته يشتغل تاني بالقانون”.