خلاف على الأجر.. كواليس انسحاب محمود عبد العزيز من فيلم "أوضتين وصالة"
كشف الكاتب والسيناريست محمد صلاح العزب عن كواليس انسحاب الفنان الراحل محمود عبد العزيز من فيلم “أوضتين وصالة”.
أوضح محمد صلاح العزب عبر حسابه الشخصي على موقع التواصل الاجتماعي فيس بوك: “صباح الفل
أنا هتكلم كتير اليومين اللي جايين عن فيلم أوضتين وصالة على الهاشتاج ده #أوضتين_وصالة
وهحكي حوارات كتير حصلت في الفيلم ده
(ومتاح للنشر لو حد عاوز ينقله وينشره)”.
تابع: “أولا ليه فيلم أوضتين وصالة ما اتعملش.
الفيلم ده أول سيناريو كتبته في حياتي في سنة 2010 وفاز بجايزة ساويرس في 2011.
ومضيته مع صديقي العزيز المنتج محمد حفظي في 2011.
واشتغلنا في الفيلم ده أنا وصديقي العزيز المخرج شريف البنداري على الفيلم في كل ما يتعلق بكل حاجة سيناريو وإخراج وإنتاج وممثلين ومنح وديكور ولوكيشنات تصوير إلى آخره”.
استكمل: “اشتغلنا في الكافيهات والبيوت والشركات والشوارع والتليفونات لمدة 8 سنين (أيوه الرقم ده حقيقي).
الفيلم قراه الفنان محمود عبد العزيز وأعجب بيه جدا بعد ما كان محبط من فيلم إبراهيم الأبيض ومش عاوز يعمل سينما تاني..
وبعد ما قرأه قرر إن ده الفيلم اللي يختم بيه حياته السينمائية.
واشتغلنا على الفيلم أنا وشريف والساحر الله يرحمه لمدة سنتين ما بين بيت محمود عبد العزيز في زايد وكابينته في المنتزه، ولما جه وقت الاتفاق عيالفلوس عشان ندخل نصور محمود عبد العزيز الله يرحمه طلب 4 مليون جنيه، وحفظي مرضيش يدفع غير مليون جنيه واحد..
فمحمود عبد العزيز الله يرحمه قال أنا مش فارق معايا الفلوس بس أنا مش هقلل من نفسي، وده رقم مياخدوش عيل صغير، ومكملش الفيلم” .
أردف: “وبعد وفاته الله يرحمه الفيلم راح للفنان الكبير يحيى الفخراني.. ودي قصة تانية هحكيها في الحلقة القادمة”.
يُذكر أن فيلم “أوضتين وصالة” مأخوذ عن مجموعة قصصية لإبراهيم أصلان بعنوان “حجرتان وصالة” وكتبه السيناريست والكاتب محمد صلاح العزب، وحصد به جائزة أفضل سيناريو من جوائز ساويرس الثقافية عام 2011.
وفاز الفيلم بدعم 60 ألف دولار من مهرجان القاهرة السينمائي الدولي والمركز القومي للسينما كمساهمة في الإنتاج، كما حصل على دعم من معهد الدوحة للأفلام.