محمد أنور: اتبهدلت في "البعبع"
قال الفنان محمد أنور، إن ظهوره في نهاية فيلم “البعبع” لم يكن مكتوبا، فهو من اقترح هذا المشهد على المخرج حسين المنباوي، موضحا أنه يحب العمل جدا، ويبذل أقصى جهد فيه.
أضاف “أنور” خلال لقائه في برنامج “الراديو بيضحك” عبر إذاعة “الراديو 9090”: “أنا بحب الشغل أوي ومعنديش مشكلة أتعب فيه، الفيلم ده أنا اتبهدلت فيه بشكل مش طبيعي، أنا أعمل اللي يرضي ضميري وكل اللي أقدر عليه بعد كده تاخده ماتخدوش مفيش مشكلة”.
نرشح لك: لطفي لبيب وخالد الصاوي ضيوف شرف “وش في وش”
أشار: “أنا قعدت 8 ساعات في جبس بجد، جابوا جبس بلدي وعملوه لأن الجبس العادي بيتكسر من الشمس، ومتعبة جدا.. أنا قاعد 8 ساعات لا ينفع أكل ولا أشرب ولا أدخل حمام، شركة الإنتاج كانت عايزة تحط الشوت ده في البرومو بس خافوا لنحرق القفلة، وفي الآخر مخدوهاش في الفيلم”.
أوضح: “أنا بولع في الفيلم وكانوا دايما بيجيبوا دوبلير، هما في الأول قالوا لي ده فيلم أكشن وهتبقى في حتة جديدة، فأنا قولت أنا عايز أتعلم الأكشن، ومكنتش أعرف أن الأكشن هيتعمل فيا، أنا بقيت أحسن واحد في مصر يضرب، وطول الوقت أمير كرارة بيقول لي في المشاهد دي بيجيبوا خد مكانك متقلقش، جابوا حد مكاني في يوم الولعة وأنا كنت مرعوب عليه”.
تابع: “أمير كرارة قال لي لو عملته أنت هتتشهر زي إبراهيم الأبيض، قال لي شوف السقا بعد إبراهيم الأبيض، قولت للراجل هو ينفع أنا أولع، عملتها وأول مرة الولعة بقت أوفر لدرجة أنها عدتني، وممكن أكررها تاني أنا مبخفش”.
الفيلم من بطولة الفنان أمير كرارة الذي يعود من خلاله للسينما بعد غياب 3 سنوات عقب فيلم “كازابلانكا”، يجسد “كرارة” دور مجرم تائب يدعى “سلطان” يواجه العديد من المواقف، بينما تجسد الفنانة ياسمين صبري خلال العمل دور دكتورة صيدلانية تلتقي بـ “سلطان” المجرم التائب.
يشارك في بطولة الفيلم كل من باسم سمرة، ومحمد عبد الرحمن توتا، ومحمد أنور، بالإضافة إلى عباس أبو الحسن، وهو من تأليف إيهاب بليبل وإخراج حسين المنباوي، ويدور في إطار أكشن لايت.