مصطفى هريدي: "لبس الشباب دلوقتي مبيخليش البنت تحس أن فيه رجولة"

أعرب الفنان مصطفى هريدي عن استيائه بسبب عادات الموضة في الملابس في الوقت الحالي، مؤكدًا أنها تختلف عن زمانه كثيرًا، كما كشف كيف يتغلب على الأزمات في حياته.

قال “هريدي” خلال حواره مع الفنانة انتصار وبدرية طلبة ونوليا، في برنامجهم “من غير نفسنة“، المذاع عبر شاشة قناة “هي”: “الصدمات بتعدي بالتنفيض وتريح الدماغ، والدنيا ماشية والماديات مش كل حاجة، أنا رامي حمولي على ربنا، وربنا ساترها معايا طول ما أهلي في ضهري”.

تابع: “بتعرفي في حياتك ناس كتير ومينفعش تقولي عليهم كلهم أصحاب، الحقيقيين والثابتين هما بس اللي يتقال عليهم أصحاب، واللي ببدأ بيهم حياتي”.

انتقد مصطفى هريدي الموضة، قائلًا: “أنا مبقتش أعرف أدخل اشتري بنطلون جينز، البناطيل اللي موجودة دلوقتي مش بتاعتنا، أنا فاكر زمان كان أبويا ياخدني عند الترزي ويفصلي القماش الصوف بالكسرة الكلاسيك، حتى البنطلون الجينز دلوقتي مش زي بتاع زمان.. دلوقتي بيبقى ساقط والبوكسر باين وملزق وشبه البنطلون الاسترتش، الموضوع اختلف عن زمان، والبنات مبتبصش على ده ومبتحسش أن فيه رجولة”.

كما كشف الفنان مصطفى هريدي عن المهنة التي امتهنها قبل مهنة التمثيل، مؤكدًا أنه دخل التمثيل بمحض الصدفة ولم يكن هدفه من الأساس. قائلا: “أيام الجامعة وقبل التمثيل اشتغلت في التجارة وكنت فاتح محل بتاع أدوات منزلية، وكان معايا قرش، ودخلت التمثيل سنة 2002، والتمثيل مكنش في دماغي، وأول عمل في حياتي كان مع الزعيم عادل إمام في فيلم التجربة الدنماركية”.

وعن طفولته، قال: “كنت من المتفوقين في لغاية ابتدائي ومن بعد الابتدائي التفوق قل شوية، وأنا بدأت مصروف من وقت ما كان 10 ساغ الزرقاء، ولما كبرت شوية كان ربع جنيه، وعلى بداية ثانوي كنت باخد مصروف جنيه”.

“من غير نفسنة” برنامج نسائي ساخر يقدمه كلا من الفنانة انتصار وبدرية طلبة ونوليا، يعرض يوميًا من السبت إلى الثلاثاء، ويقدم عددًا من القضايا الاجتماعية بطريقته الساخرة والخاصة من خلال استضافة عددًا من الشخصيات المؤثرة على السوشيال ميديا والمشاهير والفنانين لمعرفة آرائهم في تلك القضايا.