أحمد فهيم: مسلسل "جعفر العمدة" لا يشجع على تعدد الزوجات
أحمد فهيم
كشف الفنان أحمد فهيم تفاصيل مشاركته في مسلسل “جعفر العمدة”، بجانب الحديث عن تفاصيل شخصية سيد التي جسدها خلال أحداث العمل.
قال “فهيم” خلال لقائه مع المذيعة نورهان عبد الفتاح، في برنامج زووم ونص، المذاع عبر شاشة قناة “هي”: “أنا مكنتش الترشيح الأول للدور، الدور جالي قبل التصوير بيومين، كنت بذاكر مسلسلات تانية جايالي من فترة وبعدين أستاذ محمد سامي كلمني وقالي التصوير بعد يومين، طبعًا كانت مفاجأة ومسئولية كبيرة جدًا بالنسبة ليا، قرأت 8 حلقات في أول يوم وبعدين صورت، ويارب تكون النتيجة على قد المجهود والدور يكون عجب الجمهور”.
نرشح لك: يوسف فوزي: مش هقدر أرجع تاني للتمثيل
تابع: “أنا مش ببص للدور بتاعي بس، أنا ببص للعمل ككل، وأي عمل للأستاذ محمد سامي أنا ببقى متوقع له النجاح من قبل ما نشتغل فيه، لأن أستاذ محمد سامي أنا شهادتي فيه مجروحة وهو شخص مهم جدًا في صناعة الدراما وفكره مختلف وبيفكر برا الصندوق دايمًا، ولكن النجاح بالشكل اللي حصل في مسلسل جعفر العمدة أنا مكنتش متوقعه بالشكل ده، ده نفحة وعطية من ربنا سبحانه وتعالى على قد ما تعبنا على قد ما ربنا كافئنا”.
أما عن الاتهامات التي لاحقت مسلسل “جعفر العمدة” بشأن تشجيعه على تعدد الزوجات، علق قائلًا: “الدراما بتسمح إننا نتناول كل القضايا، إحنا مش بنشجع على حاجة ولكن بنتناول قضية في المجتمع وأكيد في حد متجوز 4، فإحنا بنتناول القضية دي مش بنشجع عليها، القضية دي في دراما وراها وإحنا بنتناول الدراما اللي ورا هذه القضايا، والدراما بتسمح إننا نشطح بخيالنا في كل حاجة والدراما ملهاش حدود، فإحنا مش بنشجع على حاجة زي كده طبعا”.
أضاف: “المسلسل كان فيه خيوط وأعمدة كتير جدًا فمش عايزين نركز على أنه أتجوز 4 بس، وأنا مش مع ولا ضد تعدد الزوجات، على حسب الظروف وكل واحد أدرى بحياته، ونشأته وربنا يسعد الناس كلها”.
وعن تفاصيل شخصية سيد العمدة التي جسدها خلال أحداث المسلسل، قال: “سيد تعبني جدًا والحمد لله هو عجب الناس جدًا والناس لغاية دلوقتي بتنتادي عليا يا معلم سيد، الشخصية كان فيها تناقضات كتير جدًا وكنت شايفه ساعات منهزم ومنكسر ومشوش ولحظات كتير جت عليه هو مش فاهم هو عايز إيه، ولكن بالنسبة ليا كان راجل طيب موجود في مكان مش مكانه، وأقصى أمانيه أنه يعيش مبسوط”.
أكد أنه لم يتم تغيير نهاية المسلسل، قائلًا: “محصلش أن نهاية المسلسل اتغيرت، من أول ما اتكتب المسلسل والنهاية متغيرتش، وكل المشاهد اللي اتصورت هي اللي اتعرضت”.