تامر حسني: بسمة بوسيل في دمي
علق الفنان تامر حسني، على بعض تعليقات المتابعين الذي لاحظ انتشارها فور نشره لأغنية جديدة أو إحدي النكات أو الـ “إيفيهات”، وربطهم بحياته الشخصية وعلاقته بزوجته السابقة بسمة بوسيل.
كتب “حسني” عبر حسابه الرسمي على موقع تبادل الصور والفيديوهات “إنستجرام”: “ملاحظ أن في بعض التعليقات كل ما أنزل موضوع أغنية أو هزار بعض الناس بيربطوه بحياتي الشخصية، ده غلط يا جماعة”.
أضاف: “أولا: مش أنا اللي ممكن أعمل كده رغم الظروف الحالية، ما زلت أكن لبسمة كل الحب والاحترام ده غير أن هي شاركتني في اختيار أغانيا ومهما يحصل دي في دمي وأم أولادي وعلاقتنا كويسة جدا دلوقتي ولو طلبت عينيا مش هتأخر”.
تابع: “تاني حاجة أنا بحب الهزار معاكم دايما من يوم طلوعي لو في أغنية أو نكتة حلوة أو إفية حضر في دماغي أنا على طبيعتي معاكم”.
استكمل: “ثالث حاجة الفنان الحقيقي اللي يعبر عن مشاعر كل الناس في كل حالاتهم يعني أنا بفرح لما بلاقي أغانيا بتغنوها وإحساسها واصلكم لإني بتعب عشان أكتب الكلام اللي نفسكم تقولوه أنتوا.. ده لسه في أغاني توجع أوي نازلة قريب إن شاء الله.. كده مش هنزلها”.
في سياق منفصل، وصف الفنان تامر حسني، حفله في العلمين بأنه الحفل الأهم في حياته، قائلا: “يمكن قولت كتير على حفلات انها من احلى حفلات حياتي بس حفلة العلمين امبارح بجد هي احلى و اهم حفله عملتها في مشواري الفني كله”.
أضاف “حسني” عبر إنستجرام: “من اول دخلة الحفله بالطيران على كل هذا الارتفاع و اللوحه الخاصه بكل اغنيه بغنيها من عروض استعراضيه متناسقه مع كل الجرافيكس المعروض على الشاشات المتناسق ايضاً مع ابهار الالعاب الناريه اللي بيعبر عن كل حرف في اي اغنيه بغنيها”.
أردف: “بجد الحفله دي كان وراها ناس كتير مخلصه و بتحب شغلها و قبل اي شيء حابين بعض و حابين الخير لبعض عشان كده طلعنا بالنجاح الجماهيري الخرافي ده و النجاح المسرحي التاريخي ده”.
اختتم حديثه قائلا: “شكراً جمهورنا الراقي.. شكراً صناع الحفله… شكراً لاختياري لافتتاح مهرجان العلمين”.
يذكر أن الفنان تامر حسني، أحيا حفل افتتاح مهرجان العلمين، وقدم عدد كبير من أغانيه الحديثة والقديمة، ودخل الحفل ببدلة فيلم “تاج” مربوطا بحبال جعلته طائرا.