جمال العدل: اتحاد منتجي مصر هدفه عدم التنافس بيننا على النجوم
قال المنتج جمال العدل، إن الهدف من إنشاء اتحاد منتجي مصر هو تنسيق العملية الإنتاجية للأعمال الدرامية، ووضع سقف سعر لأجور العاملين بالمجال، وكذلك لعدم تنافس شركات الإنتاج على النجوم وصناع الدراما.
أضاف “العدل” خلال مداخلة هاتفية في برنامج “آخر النهار” مع الإعلامي تامر أمين، المذاع عبر شاشة “النهار”: “كان في دروب حصل في 2017 في بعض المحطات الفضائية وأغلبها كان بينها لأن كان في منافسة على المسلسلات والبرامج وعلى الإعلاميين والنجوم، فبدأت المحطات دي تخسر، لخد ما دخلت الشركة المتحدة ونظمت العملية دي شوية واشترت بعض القنوات”.
نرشح لك: الشركة المنتجة لـ “باربي” تعتذر لليابانيين بسبب السخرية من فيلم “أوبنهايمر”
أشار: “لما حصل موضوع كورونا والتضخم اللي حصل الفترة اللي فاتت دي خلت الناس بالغت جدا في الأسعار الفنيين والمؤلفين والمخرجين مش الفنانين بس كل أطراف الصناعة، ده هيؤدي بينا في الآخر أن الدراما المصرية تتوقف، المسلسل بيشتغل فيه فوق الألف شخص وبيوت مفتوحة، ولعدم التنافس بينا على النجوم والصناع قولنا نتكامل وننسق هذا الأمر بينا بحيث إننا نعمل سقف سعر لكل الناس”.
أوضح: “إحنا مش هنزل أجورهم هنعليها بس قد التضخم، مش قده مرتين تلاتة ونقدر نعمل عدد مسلسلات كافي، ونعمل تجانس وتنسيق، إحنا بقالنا فوق الـ 60 سنة في هذه الصناعة، لا بد نحافظ عليها، وهنتكامل مع الدول العربية، والاتحاد ده مش ضد حد، والفترة العصيبة دي عايزين نقفل جنب بعض، هي مهنة مهمة كلنا لازم نقف جنبها ونحميها، ونحتضن كل الشركات اللي طالعة، وتبقى موجودة معانا”.
أردف: “إحنا عايزين نعمل موسم برا رمضان، ونطلع مسلسلات أخرى زي مسلسل (بالطو) كان تجربة رائعة لشباب جداد، نقدر نعمل ده طول الوقت، مصر أجمل ما فيها ممثلينها ومثقفيها وكتابها”.