عباس أبو الحسن يكشف أسباب حذف مشاهد من فيلم "إبراهيم الأبيض"

كشف الفنان عباس أبو الحسن، عن تفاصيل حذف بعض المشاهد من فيلم “إبراهيم الأبيض”، بطولة الفنان أحمد السقا، والفنان محمود عبد العزيز، موضحا أن جميع أبطال العمل حذف لهم مشاهد من الفيلم.

أضاف “أبو الحسن” خلال لقائه في برنامج “أسرار النجوم” مع الإعلامية إنجي علي، المذاع عبر راديو” نجوم إف أم”: “السيناريو كان 130 ورقة وكلهم اتصورا بس في مشاهد مروان حامد شالها بنفسه، لأنها كانت دون الجودة اللي هو عايزها لأنها كانت مشاهد صعبة أو تقنيا، وده في مشهد باسم سمرة، ومشكلته أنه مشهد محوري هيلغبطك لو مش موجود ولو موجود كان هيخلي الفيلم ملحمي أكتر”.

نرشح لك: تكريم سوسن بدر في الدورة الخامسة لمهرجان “ميدفست مصر”

أشار: “لو قولت لي حد يعمل السيناريو كله زي ما هو، ولا ترضى بده؟ هرضى بيه، لأن بدون مروان الفيلم هيفقد نص تأثيره ورونقه وسحره، مروان عمل فيه حاجات خرافية، لأنه كان مآمن بيه وحاسه، فالحذف جزء منه تقنيا، أو الأداء معجبوش أو الممثل تبت في أداء معين، والجزء التاني أن الفيلم بعد ما خلص كان ساعتين فاضطر يشيل من الفيلم”.

أوضح: “مروان عمل أفضل حاجة جوا التصوير، والقرارات اللي خدها، وهو مكنش قدامه غير أنه يعمل ده ودي كانت محتاجة جرأة وواحد واثق من نفسه، الحذف مكنش بسبب الرقابة، لأن الفيلم قصة حب ومالوش علاقة بعبده موتة، والحاجات دي هي قصة حب بتدور والعنف هو أسلوب الحياة هناك”.

فيلم “إبراهيم الأبيض” عرض عام 2009 الفيلم، ومن بطولة أحمد السقا، محمود عبد العزيز، هند صبري، سيد رجب، محمد ممدوح، عمرو واكد، ومن إخراج مروان حامد، وتأليف عباس أبو الحسن، وإنتاج جود نيوز فور فيلمز.