رد نيللي كريم على خلافها مع صناع فيلم "ع الزيرو"
تحدثت الفنانة نيللي كريم عن مشاركتها في فيلم "ع الزيرو" وحقيقة خلافها مع صناعه كما أذيع مؤخرا، مؤكدة أنها ترى نفسها ضيفة شرف في الفيلم وليس هناك خلاف بينها وبين صناع الفيلم.
قالت "كريم" خلال حوارها مع الإعلامية فاطمة مصطفى في حلقة اليوم من برنامج "الراديو بيضحك" المذاع عبر إذاعة "الراديو 9090"، إن فيلم "ع الزيرو" قصته إنسانية يتناول كفاح أب للحفاظ على حياة نجله، مشيرة: "محمد رمضان هايل ولذيذ، وكل المشاهد الأكشن كان بيعملها بنفسه، روحنا المنصورة والناس بتحبه جدا، وفي القاهرة وأي حته بنروحها الناس دايما بتحتفي به".
أكدت أنها ليست على خلاف مع صناع فيلم "ع الزيرو" ولكنها لديها وجهات نظر مختلفة كممثلة، مؤكدة أنها سعيدة بالتعاون مع المخرج ماندو العدل والفنان محمد رمضان.
أوضحت: "معنديش أي تعليق غير إني كنت سعيدة إني اشتغلت مع ماندو العدل ومع محمد رمضان، لكن بالنسبة لي كورق ودور اعتبريني طلعت ضيفة شرف في الفيلم، وهو فيلم بطولة محمد رمضان والطفل هي دي الرحلة بتاعتهم".
أضافت: "أنا معنديش مشاكل مع حد ولكن عندي اختلاف في وجهات النظر كممثلة، دايما في شركات الإنتاج معندناش حتة إدارة الممثل، بيكون المهم المشروع، محدش قلبه على الممثل إزاي أطلعه بأحسن شكل وأعمله أحسن حاجة، أعتقد كل منتج همه المشروع ككل، فلو أنتي ماخدتيش بالك من نفسك ومخططتيش عايزة تعملي إيه، محدش هيعملك ده".
وعند سؤالها عن عدم تعاونها مع "العدل جروب" في رمضان القادم، أوضحت: "أنا دايما بدور على العمل والورق الكويس والحاجة المختلفة، الورق الحلو والمشروع الحلو هو اللي بيشدني، وأنا مش ماضية عقود احتكار مع حد، واشتغلت مع ناس كتير، وأهم حاجة أنا هعمل إيه".
يشار إلى أن فيلم "ع الزيرو" بطولة النجم محمد رمضان و النجمة نيللي كريم، چومانا مراد، خالد الصاوي، محمد لطفي, شريف دسوقي، إسلام ابراهيم، تأليف د. مدحت العدل و إخراج محمد العدل و من إنتاج جمال العدل و أحمد العدل و استوديوهات ڤوكس.
يناقش الفيلم قصة إنسانية لمعاناة أب فقير مع مرض نجله، وكفاجه ومحاولاته لإنقاذ حياته، ولكن تتطور الأحداث ويصبح من الأغنياء.