والد سيف شكري: ابني كان حاسس بالمظلومية

قال شكري محمد، والد لاعب المصارعة سيف شكري، إنه لم يكن على علم بسفر نجله، موضحا أن نجله تواصل معه بعد سفره، وطمئنه عليه ولكن لم يذكر له أي تفاصيل أخرى.

أضاف "شكري" في مداخلة هاتفية لبرنامج "مصر جديدة" تقديم الإعلامية إنجي أنور والمذاع مساء اليوم الأحد عبر فضائية "etc": فوجئنا أن سيف اتأخر، واتصلي بيا وقال لي متقلقش عليا، وتاني يوم كلمني وقال لي أنا في بولندا، سيف ماتكلمش في تفاصيل أو أسباب كلامه قليل ومطلعش اللي في قلبه".

تابع: "سيف وصل 22 سنة، وجواه عبء كبير أنه مش قادر يشيل نفسه ماديا، هو حساس ووالده لحد دلوقتي بيصرف عليه، ومصاريف جامدة جدا، لأن أي لعبه فردية بتكلف جدا خاصة المصارعة من تغذية وملابس وأحذية خاصة ومكملات وغيرها، وهو كان حاسس أن في مظلومية جواه".

أوضح: "سيف قبل سفره كان بييعتذر عن أنه محمل عليا وبيقولي أنا عارف إني المفروض أشيل نفسي، وأنا كنت بخفف عنه وبقوله لكل مجتهد نصيب، وربنا هيعوضك وأنت بتتعب كتير جدا، سيف بيعشق المصارعة ومن عمره 5 سنين".

أشار: "سيف بالرغم من كونه بطل الجمهورية تحت 17 سنه لم يشارك في أي بطولة دولية وكان المفروض يشارك في كذا بطولة، وهو أحسن لاعب في مصر، وبالفعل صدر قرار وزير أنه يمثل مصر عالميا إلا أنه لم ينفذ القرار مما أثر عليه".

في نفس السياق قال إبراهيم عادل، عضو مجلس اتحاد المصارعة، إن سيف شكري، لاعب منتخب مصر للمصارعة الحرة، كان رفقة معسكر المنتخب في قيرغيستان استعدادًا لبطولة العالم تحت 23 سنة، والدورة التأهيلية أولمبياد باريس.

أضاف "عادل" خلال لقائه مع قناة "العربية": "سيف رجع قبل زمايله هو وعمر زميله نظرا لمشاركتهم في دورة ألعاب البحر المتوسط، وكنا بنحاول نتواصل معاه عشان ينضم للمعسكر، لكن مابيردش خالص، والمدير الفني أكد أن اللاعب غادر المطار وأنه سافر وكان مع زميله في مطار دبي".

أضاف: "زميله عمر قال إحنا توهنا من بعض، بنحاول نتواصل مع عمر بأي شكل مفيش منه استجابة خالص، موقف غريب جدا، ومالوش تفسير.. سيف كان موجود مع المتخب وبيعد إعداد جيد جدا، وتصرفه مالوش أي مبرر خالص".

أشار: "الاتحاد هيعقد اجتماع يوم السبت وهيتخذ إجراءات منها إيقافه أخطار الاتحاد الدولي عشان ميشاركش مع أي دولة تانية".