حالته تدهورت.. تفاصيل الحالة الصحية لـ أشرف مصيلحي

كشفت المخرجة منال الصيفي، آخر تطورات الحالة الصحية لزوجها الفنان أشرف مصيلحي، موضحة أن حالته تدهورت مؤخرا حيث إنه مصاب بورم خبيث بالمخ.

قالت "الصيفي" خلال مداخلة هاتفية مع برنامج "حضرة المواطن" على شاشة الحدث اليوم الذي يقدمه الإعلامي سيد علي: "هو تعبان، حالته حاليا مستقرة، يعني دعواتكم.. لغاية رمضان كان كويس بعد كده الحالة بتتدهور، والدكاترة قالوا إن ده كان منتظر إن الحالة هتتدهور، هي طبيعة الحالة ونوع المرض كان معروف إن هو هيحصل كده يعني والحمد لله على كل حاجة".

تابعت: "إحنا مكناش بنقول لأن هو مكنش عارف طبيعة المرض، كان عارف أن عنده ورم بالمخ واتشال وأنه ورم حميد مش خبيث، وكان لما بيسأل ليه بعمل العلاج ده، هو مخدش كيماوي حقن، كان بياخده كبسولات مع نوعيات من العلاج الإشعاعي وحاجات تانية مختلفة، والدكتور كان بيقوله إحنا بنعمل ده علشان ميرجعش تاني يبقى خبيث، لغاية ما حالته تدهورت خالص مكنش عارف إن هو مرض خبيث، لأن أشرف لو كان عرف كان هيتعب أسرع".

استكملت: "كان بيتعالج مع أحسن دكاترة موجودين في مصر وكان فيه بروتوكول معمول مع فرنسا، محصلش أي تقصير في حالته بس طبيعة نوع الورم اللي عنده أنه نشط".