أكرم حسني: كنت متداري جوا شخصية "أبو حفيظة"

قال الفنان أكرم حسني، إنه كان يختبئ بداخل شخصية "أبو حفيظة" التي قدمها قبل دخوله مجال التمثيل، موضحا أنه لم يكن يمتلك الثقة حتى يظهر بشخصيته الحقيقية.

أضاف "حسني" خلال لقائه مع الإعلامي الإماراتي أنس بوخش، في برنامج "ABtalks": "أنا كنت متداري جوا شخصية أبو حفيظة وخايف أظهر بملامحي الحقيقية وثقتي في نفسي مش أحسن حاجة، فكنت جوا الشخصية اجرأ، فكنت مستخبي جواها وبقول اللي أنا عايزه"

في سياق آخر تحدث "حسني" عن علاقته بوالديه، قائلا: "في طفولتي كنت مرتبط بأمي أكتر من والدي، لأن والدي كان مدرب كورة وسافر الإمارات وقعد فترة، فمعظم الوقت أبويا مسافر وأمي كانت بتلعب الدورين وأنا بطبيعة الحال مرتبط جدا بأمي، هي صحبتي جدا وشخصيتها قريبة مني".

أشار: "وفاة والدي كانت مفاجأة، وكان في مرحلة طويلة قبل وفاته حوالي 4 سنين بشوفه طول الوقت بيتألم وتعبان والصحة بتتدهور، وساعات لما بيحصل أزمات ونروح المستشفى كنت بتمنى له الراحة".

تابع: "المرض بيضعف وعشان كده أنا عندي خوف من المرض طول الوقت، وأكيد ماكنش نفسي أفقد أبويا بس مش عايز أشوفه بيتألم أو بيتعذب، ولما حصلت الوفاة ربنا نزل عليا سكينة وطمأنينة أنه دلوقتي مرتاح وفي مكان أحسن، وأنه ارتاح من العذاب اللي كان بيشوفه وكنت متطمن عليه وماكنش عندي حالة الانهيار اللي بتحصل في حالات الوفاة".

أردف: "بعدها بأسبوع كملت بروفات مسرحية بدأتها.. مفيش حد بينسى أبوه وهيفضل طول الوقت معايا وجوايا بس ساعات الشغل بيخليك تتجاوز".

يشار إلى أن آخر أعمال الفنان أكرم حسني، كان فيلم “العميل صفر” من بطولة أكرم حسني وبيومي فؤاد وأسماء أبو اليزيد ومصطفى غريب ومنذر رياحنة والنجمة السعودية الشابة فاطمة البنوي وفيدرا، أيمن طعمة، إسماعيل فرغلي، أيمن الشيوي. الفيلم فكرة محمد سامي، وسيناريو وحوار وائل عبد الله، ومن إنتاج لؤي عبد الله وإخراج كريم العدل.

تدور أحداث الفيلم في إطار كوميدي حول فرد أمن يحلم أن يكون بطلاً مثل جيمس بوند، لكنه يفشل في ذلك ويتعرض للعديد من المواقف الكوميدية.