مستحيل أحجر على رأيهم.. توضيح من محمد فراج حول انتقادات الجمهور
أثارت تصريحات الفنان محمد فراج حول رأيه في انتقادات البعض للأعمال الفنية بوجه عام؛ جدلا كبيرا خلال الساعات القليلة الماضية على السوشيال ميديا والمواقع الإلكترونية.
قال فراج فيها لـ ET بالعربي: "مفيش حد من اللي اتكلم بيفهم في الشغلانة، كلهم من برا الشغلانة، وأكونتات وهمية، تحس أنهم ناس واخدة فلوس، وإلقاء تهم وطوب، الناس دي هتفضل تتكلم ليوم الدين، المهم أن القافلة تسير".
وحرص الفنان محمد فراج على توضيح تصريحاته تلك قائلا: "بعد مساء الفل، فوجئت بعدد كبير من أصدقائي بيقولولى مزعل الجمهور ليه يا فراج، بصراحة استغربت من السؤال، أنا بقالي أكتر من 15 سنة ممثل عمر ما حصل إن اتقال لي جملة زي دي .. القصة بإختصار، أنا كنت في العرض الخاص لفيلمي، واتسألت من برنامج محترم عن ردي على اشاعة انفصالي عن بسنت و إنتقاد أداء داليا شوقي، ورغم إن لا الوقت ولا المكان يستحملوا الكلام ده لأننا بنحتفل بالفيلم لكن احتراما للإعلام بشكل عام جاوبت".
أضاف: "بس زي ما كلكم عارفين ان صيغة السؤال بتتحذف في المونتاج والخبر اللى بينتشر هو الإجابة فقط لا غير، فالسؤال كان: إيه ردي على حملات الإهانة والتجريح فأنا قلت إن ده ماينفعش ناخده بجدية لكن مكنتش بتكلم على الجمهور بشكل عام إطلاقًا".
أردف: "أنا متأكد أن جمهوري اللي بنى اسم محمد فراج فاهم معنى كلامي كويس وعارف ان فيه فرق بين الرأى (حتى لو كان سلبى) وبين الشتيمة.. فيه فرق بين وجهة النظر و بين الإهانة و التجريح".
استطرد: "ومتأكد كمان ان جمهورى عارف إني مستحيل أحجر على رأيه، وياريت دايما الحكم على أي موقف أو رأي يكون بنظرة شاملة مش من خلال سطرين متاخدين من مانشيت على فيس بوك أو من فيديو اتعمل له مونتاج".
واختتم حديثه: "معلش طولت عليكم بس يمكن اللي حصل ده كان فرصة لتأكيد إمتناني الدائم بأراء الجمهور واني بستفيد من النقد والملاحظات زي ما ببقى سعيد بالإشادات. بحبكم وشكرا لدعمكم ليا من بداية مشواري".