يوسف مصيلحي عن والده: كان نفسي تكون موجود وشايف حب الناس
قال الفنان يوسف، نجل الفنان الراحل أشرف مصيلحي، إنه كان يتمنى وجود والده ليرى حب الناس، موضحا أنهم كانوا قريبين من بعض البعض.
كتب "مصيلحي" عبر حسابه الرسمي على موقع "إنستجرام": "الله يرحمك يا أطيب وأجدع وأحن أب في الدنيا، كان نفسي تكون موجود وشايف حب الناس وروحك الحلوة اللي موجودة في كل حد فينا وتشوف الناس كلها بتقول عليك إيه من أصغر واحد لحد أكبر واحد".
أشار: " أنا فعلا مش فاكر ولو مرة واحدة أنت عملت حاجه ضايقتني أو حتى شدينا مع بعض زي أي أب وابنه وده عشان إحنا كنا صحاب وكنت بتفهمني وعارف دماغي
أوضح: "أنا عارف إنك دلوقتي مرتاح أكثر بكتیر وأكيد مبسوط وأنت شايفنا كلنا متجمعين وحاسس أكيد بكل المحبة اللي كانوا موجودين اليومين دول وهيفضلو موجودين على طول ودلوقتي أنا هعرف أتكلم معاك وعارف إنك هتسمعني يمكن أكثر من آخر فترة كنت موجود وسطنا عشان كنت تعبان فمش بعرف أتكلم معاك".
أردف: "أنا عايزك تعرف إني بحبك أوي وهفضل شايل أسمك وأنا فخور إنك أبويا لحد لما أجيلك إن شاء الله، بجد بحبك أوي يا بابا وعارف إنك أكيد في الجنة إن شاء الله".
يشار إلى أن الفنان أشرف مصيلحي كان قد توفى مساء يوم الأحد الماضي بهد معاناه مع المرض.
وكانت قد تدهورت حالته الصحية خلال الفترة الأخيرة، حيث كشفت المخرجة منال الصيفي، منذ حوالي أسبوع آخر تطورات الحالة الصحية لزوجها الفنان أشرف مصيلحي، موضحة أن حالته تدهورت مؤخرا حيث إنه مصاب بورم خبيث بالمخ.
قالت "الصيفي" خلال مداخلة هاتفية مع برنامج "حضرة المواطن" على شاشة الحدث اليوم الذي يقدمه الإعلامي سيد علي: "هو تعبان، حالته حاليا مستقرة، يعني دعواتكم.. لغاية رمضان كان كويس بعد كده الحالة بتتدهور، والدكاترة قالوا إن ده كان منتظر إن الحالة هتتدهور، هي طبيعة الحالة ونوع المرض كان معروف إن هو هيحصل كده يعني والحمد لله على كل حاجة".
تابعت: "إحنا مكناش بنقول لأن هو مكنش عارف طبيعة المرض، كان عارف أن عنده ورم بالمخ واتشال وأنه ورم حميد مش خبيث، وكان لما بيسأل ليه بعمل العلاج ده، هو مخدش كيماوي حقن، كان بياخده كبسولات مع نوعيات من العلاج الإشعاعي وحاجات تانية مختلفة، والدكتور كان بيقوله إحنا بنعمل ده علشان ميرجعش تاني يبقى خبيث، لغاية ما حالته تدهورت خالص مكنش عارف إن هو مرض خبيث، لأن أشرف لو كان عرف كان هيتعب أسرع".
استكملت: "كان بيتعالج مع أحسن دكاترة موجودين في مصر وكان فيه بروتوكول معمول مع فرنسا، محصلش أي تقصير في حالته بس طبيعة نوع الورم اللي عنده أنه نشط".