كلمات أغنية "حضن أبويا" لـ مي كساب
طرحت الفنانة مي كساب، كليب أغنيتها الجديدة "حضن أبويا" عبر قناتها الرسمية على يوتيوب.
الأغنية من كلمات محمود عبدالله، وألحان محمدي، وتوزيع أحمد أمين، وجاءت كلماتها كالتالي:
بعد أبويا ما راح بعاني
واللي طبطب أو واساني
برضه كتر خيره يُشكر
بس مهما الكل خدني
جوه حضنه أو سندني
جنب ابويا شئ لا يُذكر
كل حاجه عملها ليا
مستحيل حيروح أثرها
مين يعوض قلب نبضه
أو عيون فقدت بصرها
مین ف ضيقتي دعالي قده
رحلتي ف الدنيا بعده
ربنا معايا سترها
ربنا يهون سفرها
لما كان بيشوف همومي
يبقي أقرب من هدومي
و بدعاه النور يقيدلي
حضن ابويا كان أماني
ياما شال عني وحماني
والدعا الطيب قاعدلي
وكانت “كساب” طالبت جمهورها في وقت سابق، بالمشاركة في الفيديو كليب بصورهم رفقة آبائهم.
وعلقت على الأغنية عبر حسابها على فيسبوك، وكتبت: بموت الأم بيروح طعم الحياه أمي ماتت كنت وقتها لوحدي ومحتاجه جدا لحضن بعد حضن أمي ربنا عوضني بعدها بزوج صالح وأولاد الله يعينا علي تربيتهم بموت الأب بتحس فجأه إنك تايه وحيد من غير غطا اللي زيي عنده أولاد هيكتم مش هيعرف يقع ولا ينهار عشان هو الحضن لكل اللي حواليه ربنا عالم حضن أبويا كان أماني الله يرحمه ويمتعه في الجنه مع أمي ومع كل الصالحين".
أضافت: "أغنيتي حضن أبويا غاليه جدا علي قلبي يمكن عرفت أفرغ جزء بسيط من اللي جوايا من مشاعر أغنيه هتمس كل قلب فقد حضن الامان والحمايه ربنا يصبرنا علي فراقهم ويحعلنا أولاد صالحين ندعيلهم ونعملهم طول الوقت صدقات جمهوري عيلتي التانيه حبيت أشاركم مشاعري وأتمني الأغنيه تعجبكم".