عن علاقتها بيسرا والكوميديا.. أبرز تصريحات مايان السيد في "صاحبة السعادة"

حلت الفنانة مايان السيد، ضيفة على برنامج "صاحبة السعادة" مع الإعلامية إسعاد يونس، مساء أمس الاثنين عبر شاشة dmc.

تحدثت مايان خلال اللقاء عن خوفها من الأعمال الكوميدية، وعلاقتها بالفنانة يسرا والفنانة شيماء سيف والمطرب مصطفى عنبة وباقي أبطال مسلسل "1000 حمدالله ع السلامة"، وأكثر مواقف الكواليس طرافة.

وفيما يلي نستعرض أبرز تصريحات مايان السيد في "صاحبة السعادة":

١-أول مرة أشوف فيها يسرا كنت مخضوضة، وبعدين شوية شوية الموضوع هدي، وخلاص خدت عليها، والسنادي بقيت واخدة عليها وبعتبرها حد من العيلة وبنهزر وبروح أقعد على حجرها وأحضنها.

٢-شيماء سيف بتعمل مقالب طول الوقت، لكن مقالبها كانت على قلبنا زي العسل، ولما قررنا ننتقم منها فشلنا.

٣-أصعب حاجة في المسلسل كان الكوميدي، دي كانت أول مرة أعمل كوميدي فكان تحدي كبير، لكن الكوميديانات اللي معانا شيماء سيف ومحمد ثروت كانوا بيساعدونا.

٤- لما قالوا عنبة اللي هيعمل الدور أول حاجة فكرت فيها قلت يا لهوي، هيجيبوا واحد عمره ما مثل.. لكن اكتشفت انه كوميديان بالفطرة وجنتل مان جدا وراجل كده.

٥- في مشهد كنا بناكل فيه ممبار وفشة وكوارع، واقترحت على المخرج عمرو صلاح أكل بجد بدل ما ألعبها من ناحية إني قرفانة.. أكلت جامد في المشهد وتعبت، وتاني يوم علقت محاليل ولغوا التصوير.

٦- عنبة اتأثر بالشخصية جدا وكان بيتعامل بيها، ومرة ضايقته في مشهد وإحنا بنمثل لقيته متضايق مني بجد، قلتله أنت متضايق مني ليه؟ فهي ملكة عند الممثل إنه زي ما بيعرف يدخل جوة الدور يعرف يخرج منه وميخليهوش يأثر فيه.

مسلسل 1000 حمد الله ع السلامة، من بطولة يسرا، شيماء سيف، مايان السيد، آدم الشرقاوي، عنبة، سماء إبراهيم، محمد ثروت، وأوتاكا، ومن إنتاج العدل جروب، وتأليف محمد ذو الفقار، وإخراج عمرو صلاح.

“1000 حمد الله ع السلامة” هو مسلسل اجتماعي كوميدي عن الدكتورة سميحة السويسي أستاذة الإعلام، التي تعود إلى مصر للبحث عن حماتها وعملتها في نفس الوقت، بناء على وصية زوجها قبل أن يتوفي، وتدور أحداثه في إطار كوميدي، ويجسد شخصية ابنيها، الفنان الشاب آدم الشرقاوي، والفنانة الشابة مايان السيد.