شاهد.. أكرم حسني يغني في الندوة التثقيفية الـ 38 للقوات المسلحة
شارك الفنان أكرم حسني، في الندوة التثقيفية الـ 38 للقوات المسلحة، والتي أقيمت بمناسبة مرور 50 عاما على نصر أكتوبر المجيد، بحضور الرئيس عبد الفتاح السيسي.
وخلال الندوة قدم "حسني" أغنية تعبر عن نصر أكتوبر، وجاءت كلماتها كالآتي:
6أكتوبر 73
ده التاريخ وده الزمن
كان يوم يبان طبيعي
شبه أيام كتير
لكنه في الحقيقة
كان يوم تحديد مصير
بس الزمن يومها اتقسم
ما بين هنا وما بين هناك
ما بينا وبين حشود جنود
بيقولوا يا النصر يا الهلاك
وما بين هنا وما بين هناك
حدوتة لازم تتحكي
وهتفضل دايما تتحكي
هنا التلامذة عماد وحمزة
صحيوا لبسوا المريلة
ونزلوا راحوا المدرسة يتعلموا
وهناك عماد وحمزة جنود
على الحدود حالفين ما هيرجعوا إلا بهدية
كانت الهدية يرجعوا أرض وقضية
هنا التلامذة في الفصول
كانت تقول المبتدأ مرفوع وخبره
جالنا لما جنودنا عبروا
شايلين قوارب وزنها
مفيش بشر يتحمله
ورغم ذلك كملوا
وعلموا العدو درس
والدرس جوا المدرسة
كان برده لسه في أوله
اعرب جميع ما تحته خط
الخط كان بارليف حصين
محتاج سنين
حاجز لا يمكن تكسره
بارليف منيع عايز تضيع
قرب وعمرك تخسره
اللي هيعدي هيتحرق
واللي له حق هيتسرق
والحق حتى لو اتسرق
لا يمكن أبدا يتنسى
ولازم يبان
في الراديو بتاع المدرسة جاء البيان
هنا وجنب المدرسة
الأسطى أبو سمرة السكرة
واقف في ورشة سمكرة
بيحول القديم جديد
وهناك أبو سمرة من الصعيد
بينادي بشموخ ورفعه
شد حيلك قوم يا دفعة
خلي اليوم ده يبقى عيد
أبو سمرة في وسط ورشته شغال وداير
وأبو سمرة في الميدان بيقول عدوا الخساير
هنا العربية اتجمعت كابوت ورفرف
وبلاد عربية اتجمعت وعلمنا رفرف
أبو سمرة بدل هدمته بهدوم جداد
واتمشى لحد المدرسة ياخد عماد
الماشية كانت متغيرة على أرض كانت متحررة
ورافع رأسه للأمام خلاص مش هيبص لورا
لما وصل المدرسة كانت آخر حصة عن التاريخ
الفصل قاعد منتبه ومدرسه واقف مبتسم عمال يعيد
انسوا اللي فات أصل النهاردة اتكتب تاريخ جديد
بس الزمن ده له تمن
ودفعه من كان يؤتمن
الأرض كان شايفها عرض
نيابة عن فرد فرد
كان أسد واقف في جبهة
ضحى بدمه وأرضه جابها
وشروطه فرضها فرض
كان دم طاهر يضرب به المثل في الطُهر
كان أول مرة الفجر يطلع اتنين الضهر
6 أكتوبر 73
ده التاريخ وده الزمن
أبو سمرة قصاد المدرسة واقف بالثانية في الميعاد
ودموع الفرحة بانتصار في عينيه أول ما شاف عماد
اللحظة كانت مربكة
كل الولاد أصحاب عماد إيديها كانت متشبكة
خارجين من باب المدرسة
وعلى وشهم ضحكة أمل مليانة نصر
كان صوتهم بيرج البلد وبيهتفوا باسم مصر