تعليقا على أحداث غزة.. تامر حسني: اوعوا إيمانكم يتهز

شارك الفنان تامر حسني، الجمهور بتدوينة علق من خلالها على بعض المتسائلين حول حكمة الله من الظلم والقهر الذي يحدث حاليا للشعب الفلسطيني.

كتب "حسني" عبر حسابه الشخصي على موقع "إكس": "في الوقت ده ناس كتير إيمانها بربنا ممكن يتزعزع أو ينهار ويقولوا طب ربنا فين مش هرد بالآيات والأحاديث عشان في ناس أحق مني يتكلموا بلغة الدين، بس أنا هرد رد بسيط من واقع الدنيا".

تابع: "انت لو دخلت فيلم وجالك تليفون فاستعجلت ومشيت في ربعه الأولاني هل تقدر تحكم على نهاية الفيلم.. أكيد لأ يعني متحكمش على حاجة لسه مش خلصانة، طب الدنيا لسه شغاله مخلصتش يعني متعرفش بكرا ربنا شايل ايه متستعجلش وتحكم على الدنيا وانت لسه مشوفتش مرحلة النصر اللي ربنا وعد بيها أصلاً في قرآنه.. متحكمش دلوقتي، حكمك هيكون غلط، احنا لسه مكملناش الدنيا للآخر (يمهل ولا يهمل) واللي راحوا دول جريوا على الجنة اللي هي الحياة الأساسية، حياة الخُلد، راحو دار الحق ومشيوا من دار الباطل".

أضاف: "يا جماعة الدنيا دي ولا حاجة دي دار باطل فيها الشر والكره والحقد والظلم.. لكن الناس دي راحت لحياة كلها حب وخير وسلام وفرح ولما في الآخره نشوف كل حد كانت حياته صعبة ومليانة معاناة إزاي ربنا كافئه على صبره وتحمله من كل اللي شافه وكرمه بأجمل نعيم الجنة هنقول (ياريتنا كنا احنا) الصبر يا جماعة والثقة في وعد ربنا.. الدنيا دلوقتي وسكان الأرض انقسمت ٢ ناس إيمانهم راح وناس اتمسكوا بعقيدتهم أكتر ودول أول ناس كسبوا معركة الدنيا".

اختتم: "ثقوا في كاتب الدنيا العظيم انكم لازم هتسقفوا في النهاية من حلاوة نصره وهو بينصر المظلوم بمعجزة من عنده تتحقق في الوقت المناسب اللي يعلمه هو مش إحنا والله والله والله لازم يبقى معندناش شك نهائي في رحمته وفضله، اكسبوا المعركة يا جماعة اوعوا إيمانكم بربنا يتهز احنا كلنا أصلاً عايشين في اختبار ولازم ننجح فيه.. إن شاء الله هتشوفوا بعنيكم أكبر رد من ربنا كما وعد في قرآنه الكريم (ثقوا في الله) إن وعد الله حق".

تامر حسني غزة أحداث غزة فلسطين القضية الفلسطينية