أحمد حسن كوكا يناشد باتحاد الدول العربية لمساندة فلسطين
علق لاعب كرة القدم المصري أحمد حسن كوكا، على أحداث فلسطين التي يُتابعها بحزن يومًا تلو الآخر، ودعى إلى اتحاد الدول العربية للتصدي لأي عدوان خارجي.
كتب "كوكا" عبر حسابه الرسمي على موقع التواصل الاجتماعي وتبادل الصور "إنستجرام": "بنصحى كل يوم نروح شغلنا مُجبرين عشان أهالينا وأولادنا اللي مسؤولين عنهم، وقلوبنا فيها ألم ووجع على أحبابنا وأخواتنا في فلسطين، في كل ثانية بتمر خبر جديد أبشع من اللي قبله، بنتصور أن خلاص مفيش أوحش من كده ممكن يحصل، بس مابنستناش كتير ونلاقي اللي أبشع منه".
تابع: "أعتقد إن بعد ما قصفت إسرائيل المستشفى والمدرسة والكنيسة وكل شيء مُحرم، ضاربة بالقوانين الدولية عرض الحائط، بدأت بعض الناس تستوعب أن ليس لديهم قلب ولا رحمة، بدأت تتغير الآراء، لأن بجد صعب جدًا أن يقف شخص في صف كل الشيطانية دي".
أضاف عن معاناة أهالي فلسطين مع مشاهدة أبنائهم يُقتلون بوحشية: "أب بيشيل عياله أو أعضاء من عياله في كيس بلاستيك، أجسام من غير رؤوس، كل الوحشية دي ولسه مفيش حاجة توقفهم لحد اللحظة دي، وبرغم قساوة كل اللي فات، ولسه كتير من المجتمع الغربي لا يستنكر أصلًا اللي بيحصل، خلاص كلام بلغتهم مالوش لازمة عشان كل حاجه واضحة".
ودعى إلى اتحاد الدول العربية، والوقوف جنبًا إلى جنب لتكوين قوة تستطيع التصدي لأي عدوان، مُتسائلًا: "ليه أحنا كعرب ما نتحدش؟ أنتم متخيلين قوة كل دولة عربية؟ أنتم متخيلين لو كل الدول العربية تصدوا لأي عدوان على أي دولة عربية؟".
أردف: "ممكن تكون في أبعاد سياسية تانية أنا مش فاهمها، وممكن كمان يكون تخيُلي ده قاصر، لكن اللي أعرفه أن الاتحاد قوة، والقوي هو اللي بيتعمل له حساب".