رانيا فريد شوقي ترثي أختها: مشاحنات الدنيا خدتنا من بعض
رثت الفنانة رانيا فريد شوقي، شقيقتها الراحلة المنتجة ناهد، موضحة أن مشاحنات الدنيا حالت بينهما.
نشرت "رانيا" صورة عائلية تجمعها بشقيقتها عبر حسابها الرسمي على موقع "إنستجرام" معلقة عليها: "للأسف بنعتاد الأحباب في حياتنا كأنهم خالدين في الدنيا، زي ما نعتاد النعم كأنها مستمرة إلى الأبد، وده من عيوب البشر".
أكملت: "أختي الحبيبة الغالية ناهد أنا بعتذر لك لإني اعتدك في حياتي، يمكن خيالي كان أضعف من إني أتصور فراقك، يمكن خدتنا مشاحنات الدنيا وربنا نور بصيرتنا ورجعنا لحضن بعض والحب اللي اتربينا عليه وحبنا لبابا كان دايما بيجمعنا".
أردفت: "يمكن لأني تنسيت إننا بنكبر كلنا، يمكن لأني جيت الدنيا لقيتك أختي الكبيرة القوية العنيدة اللي ماتعرفش حاجة اسمها استسلام وإرادتها من حديد قوتك كانت بطمني عليكي أنا مش عارفة أنا بكتب إيه بس اللي حساه أكبر بكتير من أي كلام مازلت مش مستوعبة و لما حد بيقول الله يرحمها بتخض".
أوضحت: "في الفترة الأخيرة كنت بشوف فيكي بابا بكل حركاته وطريقة كلامه ونظراته وهزارك وقلت للأحفاد اللي مشفوش جدهم ناهد بقت نسخة من جدكم لما تشفوها كأنكم شفتوه"
اختتمت حديثها: "سبحان الله والغريب إني من الشخصيات اللي بتخاف تدخل علي حد متوفي لأنه بيبقي آخر انطباع بيفضل في الذاكرة عن الشخص لكن لما دخلت وشفت وشك مبتسمة كأنك نايمة و بتحلمي حلم جميل حسيت إنك شوفتي فريد ابنك بيستقبلك وخدك لحبايبك بابا و طنط هدي و مها أختنا ده تفسيري لابتسامتك الهادية الجميلة الواضحة اوي اللي هونت علينا كلنا فراقك واللي مش هتفارقني اللي باقي من عمري كنتي راضية بكل أقدار الله و مسلمة أمرك لله إلى أن نلتقي يا أختي سلميلي علي بابا و قوليله الحياة من غيرك مش حياة ونفسي يجيلي في الحلم بقاله فترة غايب عني هتوحشيني أوي يا حتة من أبويا ومن قلبي".
جدير بالذكر أن المنتجة ناهد فريد شوقي، كانت قد رحلت عن عالمنا عن عمر ناهز 73 عاما، وفقا لما أعلنته زوجة ابنها الفنانة آية سماحة.
يذكر أن ناهد فريد شوقي مواليد 25/12/1950 منتجة مصرية، نجلة الفنان فريد شوقي والفنانة هدى سلطان وشقيقة الفنانة رانيا فريد شوقي من والدها، ونجلتها وهي الفنانة ناهد السباعي من زوجها المخرج مدحت السباعي.