أمير عيد: السوشيال ميديا تغتال الناس معنويا

قال الفنان أمير عيد، إنه لا يهتم بآراء الناس عنه لأنها بحسب وصفه "تغير في كيمياء مخه"، وقد تؤدي أحيانا للاغتيال المعنوي.

تابع خلال لقائه مع منصة billboard: "بقى في محاكمات على السوشيال ميديا وخاصة تويتر، الناس ممكن يغتالوا شخص معنويا دلوقت بسبب السوشيال ميديا.. عشان كده دلوقت مش بسمح لحد يغيرلي كيميا مخي بالكلام اللي بيقولوه عني".

نرشح لك: قريبا.. طرح ألبوم "النهايات أخلاق" لـ رامي صبري

أضاف: "أنا معرفش الأغاني بتاعتي بتعمل مشاهدات قد إيه، ولا الناس بتقول عليا إيه.. بس اللي بلاحظه أن الناس بتحبني وبتفاجئ بحبهم ده لما يقابلوني في أي مكان".

كما تحدث "عيد" عن بداية فكرة مشاركته في مسلسل "ريفو" وكواليس نجاح العمل، قائلا: "قابلت محمد ناير صدفة، عجبني المشروع لما قريته جدا الورق لأن القصة أنا منجذب ليها شوية وفي نفس الوقت فيها حاجة حلوة اننا بعمل أغاني وفرق وروك ستار وباند وريفو والتسعينات فيها كل الحاجات, فاللي شدني إني حبيت ألعب الدور".

استطرد أنه راودته الكثير من المخاوف المتعلقة بمدى التأثير الذي يمتلكه على نجاح العمل، موضحا: "أنا في الفرقة بعمل أغنية وبكتبها وبلحنها متحكم في المهارة دي أوي في الأغنية انها تطلع، لكن السينما الموضوع مختلف تماما الموضوع فيه عوامل كثيرة جدا كل عامل مهم جدا اللي هو بيخلي الموضوع ده وحش أو حلو".

كما وصف شخصية "شادي" التي قدمها في المسلسل: "حسيت أن هو متمرد شجاع بيواجه شعرت ان الحاجات دي متقاربين فيها مع بعض ولكن هو مش شخصيتي برضه في نفس الوقت".