عن الحجاب وعلاقتها بالله والرقص.. تصريحات جريئة لـ فيفي عبده
كعادتها، شاركت الفنانة فيفي عبده، جمهورها، بتصريحات جريئة، في أحدث ظهور لها مع الإعلامي محمد قيس على قناة "المشهد"، حيث تحدثت عن أمور شائكة في علاقتها مع الله والموت وكشفت عن ابنة ثالثة لم تتحدث عنها من قبل.
نرشح لك: فيفي عبده: أنا محجبة.. والرقص ليس حراما!
وفيما يلي يرصد "إعلام دوت كوم" أبرز تلك التصريحات:
-أنا مبخفش من الموت بس نفسي ربنا يديني عمر شوية، لأني لسة معشتوش، ولما بركع وأصلي أقوله يا رب والنبي أديني شوية وقت.
-ليلى عبداللطيف قالتلي هتعيشي لـ80 سنة، قلتلها هخنقك مش عاجبني الـ80 دول، نفسي أعيش أكتر من 100 سنة، أشوف ولادي وأحفادي أعيش معاهم، لأني اتحرمت من ده بسبب شغلي.
-أنا مطمنة خالص من مواجهة ربنا، لأني طول عمري ماشية بما يرضي الله.. مظلمتش حد، وبساعد الغلبان، أنا غلبانة زيهم.
-مش شايفة إن الرقص حرام.. هو شغل زي أي شغل، وعمر ما جه في دماغي إني أسيبه.
-لما ربنا يقولي اتحجبي هتحجب بس أنا أصلا محجبة طول الوقت، أنا محجبة بلساني وتصرفاتي وفي تعاملي مع الناس.
-أنا عاملة 37 عمرة وحاجة 5 مرات.
-عايزة أقول للناس، متشوفوش الظاهر بس، الفنانين دول عندهم حاجات كتير حلوة، ربنا بيقدرها بس أنتو مبتقدروهاش.
-أنا واخدة شهادة الحياة مش شهادة البني آدمين العاديين.
-الدنيا دي غول لو مكنتش تاكلها تاكلك.
-أنا معشتش سني أنا عشت ست عشان كده عايزة دلوقتي أعيش طفلة أعيش اللي معشتهوش.
-بيقولولي عيشي سنك، لكن أنا معنديش سن، أنا روحي 20 - 25 سنة.
-بصور نفسي بالبافتة والبزازة لأني مشوفتش ده معشتوش.
-بحاول أرجع اللي فاتني لكن عمرك ما هترجع اللي فات.
-الشللية استبعدتني في الوسط الفني عشان أنا معروفة والناس بتحبني، أنا لو لابسة البيشة وبصلي بيعرفوني من صوتي.
-أبويا كان طيب أوي وحلو جدا الأجانب كانوا بيحبوه وعايزين يتجوزوه وكنت أتمنى زوج زيه.
-هو اتجوز على أمي لأنها ست فلاحة مش متطلعة بس أنا لا يمكن أقبل ده.
-أنا بتجوز مبعملش حاجة غلط، أنا بعمل اللي ربنا قاله الحرة تتجوز وتطلق ومعرفش أعيش من غير راجل أعيش من غير راجل ليه.
-أزواجي كانوا بيحبوني أوي كنت ست الناس كلها بتبص عليها وآخر الليل بتاعته هو، ومكنش عندهم مشكلة ألبس بدلة رقص لأن ده شغلي.
-ماتجوزش في السر.. شرط الجواز إنه يكون في العلن، وأنا بتجوز في العلن، ومعروف عني ده.
-الرقص ده قدري هو قضا من عند ربنا.
-مبشتغلش في رمضان طول عمري بقضيه مع ولادي.
-عمر ما حد عاير بناتي بشغلي بالعكس بيحبوهم، لأني ست محترمة وبعرف أربي أولادي، وولادي محترمين ومثقفين.
-عندي بنت تالتة مع عزة وهنادي بس مبحبش أتكلم عنها.. هي رزق والرزق محدش بيتكلم عنه.
-أنا متكفلة بيها وبتتعلم في المدرسة لما تكبر وعايزة تظهر بعد كده براحتها.