أول تعليق من والدة نيرة صلاح طالبة العريش

كشفت السيدة نشوى جمعة، والدة نيرة الزغبي “طالبة العريش”، عن تفاصيل جديدة في قضية وقاة ابنتها، قائلة: "ابنتي لا يمكن تنتحر وكانت صايمة وتواصلت مع شيخ القرآن الخاص بها ولا يمكن تاخذ حبة غلة وتنتحر".

استكملت والدة نيرة خلال مداخلة هاتفية عبر برنامج "في المساء مع قصواء"، تقديم الإعلامية قصواء الخلالي، المذاع على قناة "CBC": "بنتي كانت صايمة، هي الصايمة هتاخد حبوب غلة؟ فتحنا تليفونها لقينا محادثات وتهديات وابتزازات، ومع ذلك سكتت، أنا ست ضعيفة ومش عارفة اروح فين، هي حكت لوكيل الجامعة وقالها أنتي مش قد زميلتك ابعدي عنها، ده في المحادثات اللي قراتها بينها وبين زمايلها".

نرشح لك: النيابة العامة تأمر بحبس المتهمين في واقعة وفاة طالبة العريش

استكملت: "كلمتها بعد الفطار وبدأت ترجع، وقالت بطني وجعاني مش عارفة في إيه، ونصحتها بتناول مشروب ليمون ساخن وانقطع الكلام".

أردفت: "بنتي صائمة وعمرها ما هتفطر على حباية غلة ولا تنتحر ولو حصل لا قدر الله تحت ضغط نفسي وعصبي

أنا لما بقيت احكي لوكيل النيابة وهو بيسألني، حسيت إن الدموع نزلت من الضغط اللي كان على البنت وشاف الرسائل والفويسات، مين يحتمل كل الكلام ده؟ أنا بنتي قوية جدا وعارفة ربنا وبتصلي وحافظة 17 جزء قرآن".

اختتمت: "يعني هي هتكلم الشيخ بتاعها يوم الجمعة وتقوله هسمع أول ورد يوم السبت بعد المحاضرات، تروح تاخد حباية غلة؟ ده لو حصل وده أضعف الإيمان، يبقى بنتي اتقلت من الضغط النفسي والعصبي، وآخر كلمة قالتها لزميلتها في الإسعاف أنا مظلومة".

واصلت: "ابنتي لقيت وجه ربها وهي صائمة 3 أيام متتالية وختمت جزء القرآن الأسبوعي مع شيخها عبر تطبيق زووم".

تابعت انها امتنعت عن التواصل مع الإعلام للحديث عن الأمر، ولكن ما دفعها للخروج والحديث هو أن المتهمين بدأوا التشهير بابنتها نيرة"، مشيرة إلى أنه تم تقديم شكوى بوزارة التربية التعليم: "قولنا عايزين حقنا لأن وكيل الجامعة هدد ابنتي بنفوذ زميلتها".

اختتمت: "حق بنتي عند ربنا، وأنا بتكلم عشان ميكونش في حالات أخرى مشابهة لمثل هذه الوقائع، ولكن عند الله تجتمع الخصوم".