كلمات أغنية "على بابك جيت" لـ محمد الشرنوبي
طرح الفنان محمد الشرنوبي أغنية جديدة تحمل اسم "على بابك جيت"، بالتزامن مع شهر رمضان المبارك، عبر قناته الرسمية على موقع الفيديوهات "يوتيوب".
أغنية "على بابك جيت" من كلمات محمد يسري وألحان وتوزيع محمد الشرنوبي وميكس وماستر عمار خاطر.
وجاءت كلمات أغنية "على بابك جيت" على النحو الآتي:
فلا يكشفُ الا ما كشفت
ولا يسترُ الا ما سترت
نحتمي بحماك يا ولي المستضعفين
فلا كاشف لما سترت ولا ساتر لما كشفت
ياولي المستضعفين
ارحم ضعفي و قلة حيلتي
باجي و بروح
في كل حتة بس مش لاقي الطريق
ولا حتى مسندني صديق
هيكون راح فين بس الطريق
اوقات كتير
بحاول الجأ لك واخاف ماتقبلنيش
هدعي و هحاول ماشتكيش
هدعي وارجوك ماتردنيش
على بابك جيت
شايل بين ايدي ذنوبي
على بابك جيت
طمعان انك ترحمني
على بابك جيت
لو بس ترضى عني
على بابك جيت
يارب
وفي سياق متصل، كشف الفنان محمد يسري، الذي قام بكتابة كلمات أغنية "على بابك جيت"، عن السبب الذي دفعه لكتابة هذه الأغنية.
أوضح "يسري" عبر حسابه الرسمي على موقع تبادل الصور والفيديوهات "إنستجرام": "الأغنية دي من الأغاني اللي قريبة أوي لقلبي.. بعيدًا عن أنا وشرنوبي كنا دائما حابين نعمل أغنية فيها شكل الابتهالات اللي بنحبها واتربينا عليها لكن الأغنية دي، الحقيقة مستوحاه من قصة أنا كنت سمعتها من كام سنة في خطبة عن التوبة وحبيتها أوي".
أضاف: "الدين مليان قصص عن ناس ربنا بيهديها التوبة في آخر لحظات عمرهم وطبعا الله اعلم بمين حسابه إيه عند ربنا بس المؤكد أن الله سبحانه وتعالى رحمته وسعت كل شيء".
تابع: "القصة اللي سمعتها كانت بتحكي عن شاب دخل جامع في تونس وهو في حالة هلع وعياط، ولما الناس قربوا منه عشان يشوفوا ماله لاقوه مخمور أو مش متزن عامة الله اعلم فالناس في الجامع اتضايقت جدا و بدأوا يعنفوه وأصروا أنه يخرج من الجامع و هو عمال يعيط ومصمم أنه يتوضى ويصلي".
استكمل: "كان في شيخ اسمه (عبد الفتاح مورو) بدأ يهدي الناس وحاول يتكلم مع الشاب ويهديه وفي الآخر خلاه يقف في آخر صف المصلين بعد ما اتوضى وصلى.. وبعد ما خلصوا الصلاة لقوا الشاب ده لسه في وضع السجود ومبيتحركش.. كانت المفاجأة أن الشاب ده ربنا امر بروحه وهو ساجد".
أشار إلى أن الفيديو الخاص بالقصة التي رواها متاح عبر موقع الفيديوهات "يوتيوب"، مؤكدا أنها من القصص التي أثرت به للغاية.
اختتم: "ماحدش عارف حسابه عند ربنا لكن الأكيد إن باب التوبة دائما مفتوح.. الأغنية دي مش لحد عنده ابتلاء معين، دي لأي حد عنده أي ابتلاء وخايف إن ربنا ميغفرلوش.. كلنا عندنا ابتلاءات وكلنا على باب الله بنرجوا رحمته".