مؤمن المحمدي يكتب: عزيزي الزملكاوي.. أقول لك ولا تزعلش؟
جمهور الزمالك زي جمهور الأهلي، زي أي جمهور لـ أي حاجة، فيه وفيه، مش كل كل الناس على نفس الدرجة من الوعي يعني، مش هـ أفسر أكتر من كده.
فـ كلامي هنا مش موجه لـ الزملكاوي العاقل، وهم كثير، لكن لـ الزملكاوي اللي كان بـ يهتف إمبارح: جايين السوبر ليه؟ هو إنتو كسبتوا إيه؟
بص يا جميل،
أنا مقدر إنك مالكش فـ جو البطولات، وإنك بـ تشجع فريقك علشان الانتماء، وسنظل أوفياء، ومش قصة كام بطولة، ده حب من الطفولة، وكل الكلام اللي بـ تصبر بيه نفسك. مع إنك، سبحان الله يا أخي، لما بـ تكسبوا بطولة، محدش بـ يعرف يكلمك، ولا كـ إنك عزيز بيه الأليت شاري نص كيلو لحمة حتة واحدة.
بس ده ما يمنعش، أقول لك إن البطولات يا صاحبي، بـ يبقى لها قواعد لـ المشاركة فيها، والفرق اللي بـ تتأهل لها، بـ تتساوى، بـ غض البصر عن حالته قبلها.
أبسطهالك.
دلوقتي، حضرتك كسبتوا كذا بطولة أفريقية، وهم دول تقريبا اللي عايشبن عليهم، تعالى كده نراجعهم سوا:
بطولة أفريقيا لـ الأندية أبطال الدوري سنة 1984، هو حضرتك لما شاركت فيها، كنت بطل الدوري سنة 1983؟ لأ، كان المقاولين، طب حضرتك شاركت ليه؟ هو إنت كسبت إيه؟ آه، شاركت علشان المقاولين فضل يلعب في بطولة أبطال الكأس، لـ إنه كان حامل لقبها سنتين ورا بعض، فـ كان طمعان يحتفظ بيها مدى الحياة.
بـ المناسبة، إنت ما كنتش بطل الدوري، ولا حتى بطل الكاس سنتها، لـ إن بطل الكاس كان الأهلي، فـ المقاولين مع الأهلي شاركوا في أبطال الكاس، واتقابلوا في قبل النهائي، والأهلي خد البطولة.
تمام؟
البطولة اللي بعدها، أفريقيا لـ الأندية أبطال الدوري 1986، حضرتك شاركت فيها ليه؟ هو إنت كسبت إيه؟ بطل الدوري في مصر، والكاس كمان، كان النادي الأهلي، بس الأهلي فضل يشارك في أبطال الكؤوس، لـ نفس السبب، حامل اللقب بقاله سنتين، فـ عايز يحتفظ بيها مدى الحياة، وقد كان، كسبناها فعلا، ولسه لـ حد دلوقتي في الدولاب.
وعلى فكرة، لقب 1986 ده هو اللي أهلك لـ المشاركة في الآفروآسيوي والفوز بيها.
تمام؟
البطولة اللي بعدها 1993، لأ، دي حرام، كنت إنت بطل الدوري 1992
اللي بعدها لقب الأندية أبطال الدوري 1996، شاركت فيها ليه، هو إنت كسبت إيه؟
سنتها الأهلي كان بطل الدوري، والمقاولين بطل الكاس، وإنت شاركت بدال الأهلي، اللي كان مش بـ يشارك في بطولات أفريقية، لـ أسباب مش ده مجالها، واشتركت كـ بديل لـ البطل عادي، وخدت البطولة وعلى أساسها كسبت السوبر والآفروآسيوي.
فـ إنت تلات أرباع ألقابك القارية جايبها من مشاركات كنت فيها دوبلير لـ البطل الفعلي، ومحدش اتكلم، عارف ليه؟
لـ إن الواحد فاهم إن كل بطولة، وكل لقب بـ يبقى مستقل بـ ذاته، بل كل دور في بطولة كده، لو فريق صعد أول مجموعة، وفريق صعد كـ تاني مجموعة، في كاس العالم مثلا، بـ يتساووا في الأدوار اللي بعدها.
فـ لقب السوبر، على الرغم من اعترافي بـ إنه لقب تافه مش حاجة فظيعة، إلا إنه بـ يمنح لـ الفائز في المباراة، مين اللي يشارك في المباراة؟ دي قصة تانية خالص، وماهيش حاجة اخترعناها دلوقتي.
إحنا خدنا الدوري والكاس مرتين 2006 و2007، وكل كرة كنا بـ نلاعب وصيف الكاس عادي، مكناش بـ نقول حاجة، بس كنا بـ نكسب السوبر وقتها.
وهو ده الفرق
وصلت؟