مواقف إنسانية ترويها يسرا عن الزعيم

قالت الفنانة يسرا إنها لو تحدثت العمر كله عن مواقف الزعيم عادل إمام الإنسانية معها، لن توفيه حقه أبدًا.

أضافت يسرا خلال حلولها ضيفة على "بيج تايم بودكاست" مع أصالة وعمرو أديب: "عادل إمام ممكن اتكلم عنه العمر كله، في كل أزمة مريت بيها في حياتي كان واقف معايا".

وعن أحد تلك المواقف قالت: "مرة مكنش عندي فلوس، وعندي عربية مرسيدس كنت هبيعها لحد ما ربنا يفرجها، لقيته جاي البيت وبيقولي عايزة تبيعي عربيتك ليه؟ فخطط إنه ياخدني في فيلم وقالي اطلبي اللي أنتي عايزاه".

وعن موقف آخر كشفت: "كنت مرة تعبانة جدا وكنت بموت حقيقي.. كانت عملية 6 ساعات والهيموجلوبين فقدت كتير منه كنت لون الملاية البيضا.. كان يكلمني بيتابع معايا ويقف جمبي كل يوم".

أما الموقف الثالث قالت عنه: "كان في حادثة كنت المفروض أخرجها منها ميتة، وكان في مسرحية، إخراج الأستاذ شريف عرفة، وهو عمره ما بيقفل المسرح أبدًا، قفله وجاب الكل وجالي فورًا، ما بيسيبش صحابه أبدًا".

وعن أبرز صفات الزعيم قالت الفنانة يسرا: "عنده تقييم للبني آدمين مخيف، مرة كان معانا واحدة قالي أيه دي؟ قلتله صحبتنا قالي تؤ؟ قلتله عرفت منين أنت لسة شايفها من 5 دقايق إزاي حكمت عليها كده؟ وطلعت زي ما قال فعلا".

أردفت: "الراجل ده ما يسيبش صحابه أبدًا، الراجل ده تجربيتي معاه عظيمة.. يسعدك، يهنيكي، كواليسه عظيمه، جدعنته محصلتش، فنه ملوش زي".