أبرزها عن عودته من الاحتراف ورضا عبد العال.. 12 تصريحا لـ إمام عاشور
تحدث إمام عاشور، لاعب النادي الأهلي ومنتخب مصر، عن كواليس انتقاله إلى الأهلي وعلاقته بالزمالك.
نرصد فيما يلي أبرز تصريحات إمام عاشور في برنامج "ع المسرح" المذاع على شاشة الحياة وتقدمه الإعلامية منى عبد الوهاب:
1- ميتلاند مكنش كوبري علشان أروح الأهلي.
2- لما قررت أرجع مصر كلمت كذا حد علشان ارجع الزمالك، بس ملقيتش تقدير، وقالولي روح خلص أنت نفسك.
3- جمهور الزمالك اللي بيحبني، أنا متأكد أنهم بيحبوني، فاهمين إن كان فيه مشاكل في الإدارة.
4- وفي الوقت ده مفيش حد من الأهلي كلمني.
5- بس أنا لما لقيت رسالة من الأهلي مخدتش تفكير 1٪ في القرار إني ألعب في الأهلي، أي لاعب يتمنى يلبس تيشيرت الأهلي.
6- مفيش حد في مصر ميعرفش إن النادي الأهلي نظام
7- أول شخص قعد معايا كابتن محمود الخطيب، وهو ليه الفضل وبشكره على مساندته لينا، وكابتن خالد بيبو طبعا، هو اتكلم معايا في نقط بسيطة اللي هو خلاص إحنا في النادي الأهلي، فيه سيستم، قولتله يا كابتن أكيد أنا عارف كل الكلام ده، ووعدته إن شاء الله هجيبله أفريقيا
8- أسرتي كانت زملكاوية، وخلاص البيت كله أهلاوي
9- الدكتور النفساني أساسي في حياة أي بني آدم، بيبقى عنده حاجات بيفهمها أكتر مننا في شغله، بس هو فيه فعلا، واتكلم معايا عن الانفعالات والغضب، أول ما روحت النادي الأهلي ،كده كده في دكتور نفساني بس بالأخص كان معايا، ساعدني كتير في حياتي وإن أنا أمسك أعصابي.
عن إهانة رموز الأهلي:
10- مفيش حد مبيغلطش، يمكن وأنا في الزمالك آه غلطت، بس أنا طلعت اتأسفت وخلاص مفيش حاجة، أي بني آدم مننا بيغلط.
سبب وصفه لـ رضا عبد العال بـ "الهجاص"
11- علشان الناس بتحب التريند، لما الاقي حد بيقطع في حد ادخل أشوف علشان اضحك، هو موجود علشان كده، عادي زي ما هو طلع أتكلم عليا أنا قولت عليه هجاص، هو فعلا هجاص.
12 - إحنا دايما هنا في مصر بنحب الشو والضحك لما بلاقي حد بيقول ايفيه بركز معاه، فهو موجود علشان كده، مع احترامي للكابتن رضا عبد العال، أنا بحبه، بس هو فعلا بيضحكني.
