إعتزال إجباري لأحمد الميرغني - E3lam.Com
محمد سلطان محمود
بعد مرور ثلاثة أشهر علي أزمة اللاعب أحمد الميرغني، لاعب نادى وادي دجلة السابق، وقيام ناديه بفسخ عقده و طرده من معسكر الفريق على خلفية قيامه بمهاجمة الرئيس عبد الفتاح السيسي عبر موقع فيس بوك، كتب الميرغنى اليوم على صفحته معلقًا علي إنتهاء فترة قيد الأندية للاعبين دون تعاقد أى نادى معه، و قال الميرغنى
” بمناسبة ان فترة القيد اتقفلت خلاص احب اقول اني بعد ما كتبت البوست مكنتش متوقع ان كل ده هيحصل بس بعد ما روحت الفندق بعدها و شوفت اللي حصل بداية من اسبعادي من مباراه الاهلي توقعت انه هيحصلي اللي بيحصل دلوقتي و اني مش هلاقي نادي بس ناس كتير كانت بتطمني و متخفش ده مش هيحصل و فعلاً لما كان حد بيكلمني علي نادي كنت بفرح بس بعد كده كان بيتأكدلي اللي كنت بتوقعه برفض اداره اي نادي
بعدها ناس كتير حاولت تساعدني و انا كنت طلعت قولت اني ممكن اكون غلطت في لفظ فاشل و دي الحاجة اللي ممكن اعتذر عليها بس كله كان بيقولي اني لازم اعتذر علي كلامي كله بس انا مكنتش مقتنع بصراحة و انا دلوقتي راضي ومستحمل نتيجة كلامي و قراري
احب اشكر كل واحد حب يساعدني او وقف معايا و حاول يدعمني حتي لو بكلام علي الفيسبوك او تويتر
وانا مش زعلان غير علي زعل امي عليا ”
و كانت تصريحات الميرغنى قد أثارت ضجة إعلامية كبيرة ، خاصة بعد إستضافته في برنامج العاشرة مساءًا مع الإعلامى وائل الإبراشي، و قيام المستشار مرتضي منصور رئيس نادى الزمالك بإجراء مداخلة هاتفية هاجم فيها الميرغنى بضراوة، و وقعت مشادة بينهما علي الهواء، دفعت الإتحاد النوبي العام لمقاضاة كلا من منصور و وائل الإبراشي.
و حاول الميرغنى بعدها التعاقد مع أى نادى أخر ، إلا ان إدارات تلك الأندية كانت تتهرب منه.