عمرو أديب ينتقد التزاحم لتصوير جنازة السعدني

انتقد الإعلامي عمرو أديب تزاحم المصورين خلال جنازة الفنان الراحل صلاح السعدني، ومحاولة البعض منهم إجراء مقابلات مع الفنانين الذين حضروا إلى العزاء، مطالباً باحترام حرمة الموت.

وأكد أديب خلال برنامج "الحكاية" عبر قناة mbc مصر، السبت، أن ما حدث خلال الجنازة لا يستوعبه عقل، قائلاً: "أي عزا أو جنازة لفنان أو مشهور، تلاقي الناس بالكاميرات بتطاردك لغاية الدفن، ودي المرحلة المؤلمة القاتلة لأي إنسان؛ هو بيجري وراك لغاية المدفن عايز ينزل معاك لحد تحت يصور أو يشوف".

نرشح لك: تامر أمين: أنا زعلان من أحمد عبد العزيز

وأضاف: "اللي بيصور ده بيصور إيه عايز إيه؟ إيه الخبر؟ الخبر راح عم صلاح السعدني مات، وإن حضر عدد كبير من الفنانين وابنه كان موجود، وإنما إيه ماسك الموبايل! إيه يا جماعة أنتوا فاهمين الموت إزاي ويقولك أصل إحنا شعب يقدس الموت ويحترم".

وتابع: "جنون الميديا عمل للناس هسهس وتوحش وعدم مراعاة لحرمة الموت.. الكل بيجري ورا اللقطة والتريند ويصوّر الناس في حزنهم ويضايقهم كمان.. فين الجدعنة والأصول بتاعت المصريين؟".

وواصل عمرو أديب: "مرة حصلت لي حادثة مروعة.. كنت تحت العربية بموت، ولقيت الناس اللي حواليا بيصوروني.. طب ادوني بوق مية؟!.. اللي نجدني اتنين دكاترة معديين بالصدفة راحوا ساحبني من بين الناس وحطوني في عربيتهم.. بتصوّر إيه ده أنا بموت.. الحقني وساعدني الأول.. عيب الوضع اللي بقينا فيه ده".