"لو حد بيعمل ذنوب كثيرة وخايف ربنا لا يقبله؟".. خالد الجندي يجيب

أجاب الشيخ خالد الجندي، عضو المجلس الأعلى للشئون الإسلامية، على سؤال فتاة حول: "هل كثرة الذنوب تمنعني من التوبة، وأحيانا في ناس بتشعر إن ربنا لا يتقبلها؟".

أوضح "الجندي" خلال حلقة خاصة بعنوان "حوار الأجيال"، ببرنامج "لعلهم يفقهون"، المذاع على فضائية "dmc"، اليوم الأربعاء: "لا أحد من الناس يتكلم نيابة عن الله، وبالتالي مش من حق حد يقول ربنا زعلان منك، أنت مين أنت معاك تفويض مثلا هو جالك وحي؟! مفيش وحي بعد سيدنا النبي عليه الصلاة والسلام فبالتالي محدش يتكلم باسم الإله".

تابع: "أمراء الجماعات الإرهابية اللي عملوه إيه جريمتهم إيه؟ أنهم بيتكلموا باسم الله وكان في مسلسل اللي هو بتاع الحشاشين ده اللي قدمته الشركة المتحدة، كان مسلسل مهم جدا بيوجه الناس لحاجة في منتهى الأهمية بيقول له أنت كل القصه دايرة حوالين واحد أوهم غيره أن معاه مفاتيح الجنة، فهل هناك واحد معه مفاتيح الجنة؟! أكيد لا وبالتالي كل إنسان يؤخذ منه ويرد".

تابع: "احتمال الخطأ والصواب وارد من كل إنسان فمفيش حد يمضي على بياض لحد، وبالتالي عيب بعض الأولاد في الجيل في الجيل بتاعكم أن هم بيصدقوا كل ما يقعد في السوشيال ميديا بيقبلوا أي خبر من غير تريث أو تثبت ممكن يزعزع ثوابت عندك ودي مشكلة كبيرة جدا.. يعني استعدادك لتصديق كل ما يقال ويكتب على السوشيال ميديا.. بعض الناس فاكر أن واحد يكون عنده مدونة على النت أنه ده سيدنا جبريل اللي بيكتب المدونة، بعض الناس فاكر أنه مجرد أن واحد بيقول رأيه في مسألة أن ده الإمام الشافعي اللي كتب رأيه الفقهي في المسألة".