عبد الله السعيد عن انتقاله للزمالك: حاسس إني رجعت للحياة

تحدث عبد الله السعيد، لاعب نادي الزمالك، عن انتقاله للقلعة البيضاء هذا الموسم، موضحا أن القرار كان له عاطفة.

قال "السعيد" في برنامج "الكورة مع فايق" الذي يقدمه الإعلامي إبراهيم فايق على شاشة mbc مصر 2: "خطوة انتقالي للزمالك كانت بالعاطفة، الناس حابة أنها تشوفك عندها، حسيت فيه حب اداني شغف إني عايز ألعب، حاسس إن أنا رجعت للحياة، اللعب برضو لنادي جماهيري مختلف، وكمان لما تبقى الناس بتحبك".

وكشف كواليس توقيعه للزمالك أثناء تواجده في الأهلي، موضحا: "كنت لاعب حر من حقي ألعب في أي نادي، وفي التفاوض كان جايلي عروض بأرقام ومعروض عليا من الأهلي أرقام بعيدة، وقالولي خلاص لو جايلك الأرقام اللي أنت بتقولها خلاص شوفها".

تابع: "الفرق بين رقم عرض الأهلي والزمالك كان بعيد، الزمالك قدم العرض وأنا قولت طلباتي ووافقوا، ومضيت كل حاجة، لما مسئولين الأهلي عرفوا، اجتمعت مع محمود الخطيب وسيد عبد الحفيظ وعدلي القيعي وحسام البدري والمستشار تركي آل الشيخ".

أردف: "المستشار تركي آل الشيخ كان عارض على الاهلي أنه يخلص موضوعي من بدري بس مسئولين الأهلي رفضوا وقالوا إن الفرقة هتبوظ، معنديش مشكلة بس خلاص، ليه بقى اطلع بشكل وحش؟ دلوقتي إحنا متفقناش، وعقدي خلص، خلاص أنا مش عايز وأنت الموضوع بعيد، وخلاص أنا مش متضايق فالطبيعي إن أنت تطلعني بشكل كويس ليه توري للناس الشكل الوحش وده مش حقيقي".

أشار إلى أن المستشار تركي آل الشيخ تدخل ووقعت للأهلي وتعهد هو بإنهاء الأمر مع الزمالك، متابعا: "مكنتش أعرف بقرار عرضي للبيع بعد ما مضيت، ومكنتش متوقع، أنا كنت متوقع في الجلسة يقولولي خلاص مضيت للزمالك، شكرا، لما لقيت فيه حب والناس بتقول إحنا عايزينه، صدقت الناس، يمكن كان فيه حاجة غلط".