متجاهلا اتهامه بالقتل الخطأ.. عصام صاصا يستعد لطرح كليب "صيع منحرفين"

يستعد مطرب المهرجانات عصام صاصا، لطرح فيديو كليب "صيع منحرفين" بالتعاون مع مطرب المهرجانات أمين خطاب، بعد دهسه شخص بسيارته على الطريق الدائري في 6 مايو الماضي.

نشر "صاصا" برومو الكليب عبر حسابه الرسمي على موقع الصور والفيديوهات"إنستجرام" معلقا:"استنونا يوم الخميس 6/6 كليب صيع منحرفين عصام صاصا وأخويا امين خطاب".

كان مطرب المهرجانات عصام صاصا، قد علق على اتهامه بالقتل الخطأ والتسبب فى وفاة عامل عقب دهسه بسيارته، موضحا سبب عودته لاستكمال النشاط الفني في الوقت الراهن.

قال "صاصا" عبر منشور له عبر حسابه الرسمي على موقع التواصل الاجتماعي "فيس بوك": "ربنا وحده يعلم أنا بكتب الكلام ده وأنا عامل إزاى و فيا إيه.. أنا بقالي أكتر من شهر قاعد من غير شغل ومعنديش أي حاجه أعملها غير إني قاعد وما باليد حيلة ومستني قضاء ربنا سبحانه وتعالى ومحدش هيفهم أو هيحس بالموضوع غيري".

أضاف: "أنا مطلعتش اتكلمت وعدت وزدت في الموضوع كتير ومحدش شافني حتى بفيديو قولت أي كلمة خالص"، موضحا أنه مسئولا عن عقود والتزامات واجبة التنفيذ وإلا سيضطر لدفع شروط الجزاء، هو غير قادر عليها، مضيفا: "أنا هنزل شغلي وهشتغل، لأن مش بإيدي أي حاجة غير إني أعمل كده".

تابع أنه يتحمل مسئولية 35 شخصًا يعملون في فرقته إلى جانب والدته وشقيقة وزوجته ونجله، موضحا أنه ما زال شاب في مقتبل العمر يبدأ حياته، ولديه مصاريف عديدة للمنزل وأقساط أخرى، متسائلا: "أنتوا ماتعرفوش عنها حاجة، مين اللي هيدفعها؟".

وجه رسالة للجمهور، قائلا إنهم يجب أن يفهموا أن ما يستمعوا إليه ليس كله صحيحا، فلا يوجد فلوس وقصور وسيارات، مؤكدا:

"الناس اللي شاغلين معايا كل دول حالهم واقف بسببي، كل دول ليهم بيوت وعيال ودنيا تانية خالص، وعارف ومتاكد أن ربنا مش هيورينا الشر ومش هيوريني أي حاجة وحشة".

اختتم: "ده ابتلاء من عند ربنا سبحانه وتعالى، وأنا راضي بكل حاجة ومش هقول غير الحمد لله على كل شئ.. والحمدلله واللي ربنا كاتبهولي هشوفوا؛ سوا خير أو شر.. محتاج من كل الناس اللي بتحبني تدعيلي من قلبها بجد.. أنا عمري ما كنت شخص مؤذي وعمري ما كنت شخص وحش مع حد، ربنا كبير.. وحشتوني أوي يا أحلي جمهور في الدنيا".