حاول قتلها وحرمها من ابنها.. أبرز تصريحات زوجة سفاح التجمع

تحدثت لبنى غانم، زوجة "سفاح التجمع"، المتهم بقتل النساء الثلاثة، والمدعو "كريم.م.م"، عن تفاصيل حياتها معه.

قالت لبنى غانم في مداخلة هاتفية مع برنامج "الحكاية" المذاع على شاشة mbc مصر ويقدمه الإعلامي عمرو أديب: "اتعرفت عليه واتجوزنا من أكتر من 10 سنين بس أنا بقالي دلوقتي أكتر من 3 سنين معرفش حاجة عنه وواخد ابني ومش مخليني أكلمه ومشوفتش ابني من أكتر من 3 سنين، معرفش الولد فين وبقالي 3 سنين بدور عليه بحاول أوصل لأي حد، بقالي 3 سنين بموت عايزة اخد ابني في حضني مش عارفة اوصله".

تابعت: "حاول يقتلني أنا وأخواتي كتير، أنا كان المفروض كنت أبقى أول ضحية عنده وكنت بهرب، كان في البيت حاجة وقدام الناس حاجة تانية، هو ومامته كمان اللي واخدة ابني، أنا بكلمها كل يوم وهي مش عايزة ترد ومش عايزة تخلي ابني يشوفني، روحت بريطانيا بسبب تهديداته، وبيبعتلي أنا وأخواتي رسائل لو أختكم مابنتش دلوقتي أنا هقتلكم كلكم".

أردفت: "وبقالي 3 سنين مش عايشة ومستخبية من واحد مفيش حد عايز يصدقني أن هو عايز يقتلني وبيقولوا مش هيعملك حاجة، كل يوم ورايا، بيلاقيني في القاهرة في اسكندرية، علشان كده روحت بريطانيا لماما، مكنتش عايزة أسيب ابني وفي نفس الوقت عارفة لو قربت من ابني هو هيقتلني".

استكملت: "أنا عيشت معاه 9 سنين كان هيقتلني كذا مرة كمان قدام ابنه، وابنه كان بيوقف بيزعقله بيقوله متضربش ماما، أنا استحملت علشان ابني بعدين أختي الصغيرة جت وبدأ يعمل نفس الحاجات معاها وقالها لو مامشيتيش من البيت هموتك واموت كلبك وخدتها وسيبته، هو مش أمريكي ومعندوش الجنسية، وعنده تهم تحرش في أمريكا ومكنتش عارفة، والشهادة بتاعته هو اشتراها ومزيفة ومامته هي اللي ختمت له الدبلومة علشان يشتغل".

اختتمت: "رافعة عليه قضية من السنين، وبقالي أسبوع في مصر، وعايزة ابني، وهو رفع عليا قضية زنا واخدت براءة علشان كان كذب، وأنا عايزة ابني وخايفة مش عايزة أموت علشان عايزة أشوف ابني قبل ما اموت، وعايزة انسيه اللي شافه من باباه".