هل يتعرض للظلم إعلاميا؟.. محمود تريزيجيه يرد

تحدث محمود حسن تريزيجيه، لاعب منتخب مصر لكرة القدم ونادي طرابزون التركي، عن اللعب للمنتخب وحلم الوصول لكأس العالم.

قال "تريزيجيه" في برنامج "الكورة مع فايق" المذاع على شاشة mbc مصر 2 ويقدمه الإعلامي إبراهيم فايق: "ده حلم بلد كاملة، تيشيرت منتخب مصر تقيل جدا، اللي ييجي معسكر واحد لازم يبقى عارف إنه في أعلى حاجة في مصر كلها وأعلى حاجة هيعملها في حياته مهما يحصل".

تابع: "أنا بلعب باسم بلدي، هموت في الملعب، لأن ده مش ماتش كورة، أنت بتلعب باسم بلدك، دايما الواحد بينزل يبص على علم بلده، وفيه أكتر من 100 مليون نفسهم يكونوا مكانك، فأنت ربنا اداك القدرة إنك تسعد الناس دي".

وعن تعرضه للظلم إعلاميا، قال: "الناس في الشارع، اللي هي مني واللي احنا طالعين منهم، بتديني حقي، كإعلام أنا آه مش واخد حقي بس لما بسمع حد بيتكلم عليا كأن مليون واحد اتكلم، لأن أنا وصلته إنه يقول حاجة حتى لو غصب عنه علشان أنا أستحق كده".

أردف: "أنا مش فارق معايا النجومية، أنا بدعي ربنا اللهم اجعلني في عين الناس كبير وفي عيني صغير، فأنا دايما شايف نفسي صغير، ومبيفرقش معايا الكلام مش هيزودني".