ميسرة تكشف سبب طلبها الزواج من وائل الدحدوح

قالت الفنانة ميسرة، إنها طلبت الزواج من الصحفي الفلسطيني وائل الدحدوح، لأنه رمز للرجل الفلسطيني وهو مؤمن بقضيته حتى إذا كان ثمن ذلك أبنائه وزوجته.

أضافت "ميسرة" خلال لقائها في برنامج "شاي بالياسمين" على قناة "النهار": "وائل دحدوح بالنسبة لي الرمز وهم رمز فخر لينا كلنا على إيمانهم بقضيتهم وإيمانهم بربنا وبيستودعوا نفسهم وأولادهم ومفيش حاجة أغلى من الإنسان إلا ابنه، وبعدين كلنا نفسنا يفتحوا لنا الجهاد وكلنا هنروح".

أشارت: "مش هقدر أشيل سلاح لكن هقدر أقف معاهم وأكون مع الدكاترة ومفيش أنبل من كده، واحنا ماتحطيناش في ظروف مشابهة عشان يبقى فيه راجل بالمواصفات دي، والإنسان بيبان في الشدائد وهو بان معدنه لأن مفيش أشد من اللي هم فيه حرب وتجويع وتعطيش والعالم كله تخلى عنهم وماشوفتش راجل وقف معايا حتى ربع الموقف ده ومحستش براجل أن هو يبقى سندي واتعرضت لمواقف وتخلوا عني في أزمات كتير مالية ومشاكل عندي وكانوا عايزين بس يخرجوا ويضحكوا وأنا مش هديك وقتي عشان بس تستمتع".

أضافت: "اتدهولت مرة في قصة حب وكنت بحب واحد لبناني بس فوقت مكملتش يعني بعد 6 شهور سيبته، لأني لقيته مش هو ده الراجل اللي هيبقى أب كويس لولادي وده أهم حاجة عندي، لأني شوفت له مواقف كتير مش حلوة ووقفت في وشه فيها رفضتها كأخلاقيات وتصرفات رفضتها وقولت وقتها إزاي ده حتى لو بحبه واتجوزت وخلفت أسمح أن الحاجات دي تحصل وولادي ممكن يشوفوها، وشوفته ظلم ناس، شوفته تجرأ على حد أضعف منه، والراجل كان مدلعني مقدرش أنكر".