أحمد سيد زيزو يروي اللحظات الأخيرة في حياة صديقه الراحل
روى أحمد سيد زيزو لاعب نادي الزمالك ومنتخب مصر تفاصيل اللحظات الأخيرة في حياة صديقه الراحل محمد مدحت المعد البدني لنادي الزمالك.
قال زيزو خلال لقائه مع الإعلامي إبراهيم فايق في برنامج "الكورة مع فايق": "محمد مدحت ماكنش المدرب اللي بتمرن معاه معظم الوقت كنا مع بعض كنا صحاب جدا".
نرشح لك: رسميا.. الأهلي يعلن رحيل أنتوني موديست
أشار: "يوم 27 رمضان وكنا بنفطر مع بعض فطرنا عادي ورجعنا للتمرين وقبل ما نوصل النادي كنا بنتكلم وفجاة سكت ومردش رحنا المستشفى قعدوا يحاولوا معاه لكن أمر الله".
وعن تعرض الزمالك للظلم تحكيمي، رد زيزو: "الموضوع ملوش علاقة بماتش المصري أوي قد ما هي تبعات لحاجات كتيرة، أنا عمري ما اشتكيت من التحكيم ولا شغلت بالي بيه، بس هي السنة دي باينة أوي ومش مع الزمالك بس، باين إن فيه حاجة غلط والناس كلها بتشتكي".
ذكر: "مليش في السهر ولا الخروجات معرفش أعمل كده أوقات بنطلع أنا مش حابس نفسي بس الفكرة إنك تعرف توازن حلو إنك تخرج وتسيب وقت لأهلك وصحابك بس الدايرة بتلف وتقفل وترجع لشغلك".
أشار: "جالي عرض من الشباب السعودي بـ 7 مليون دولار وكان في حاجات ممكن توصل لأكتر من 12 مليون، الوقت اللي هقرر أمشي فيه من الزمالك أني أفيده أو أطلعه من أزمة عمري ما هسيب الزمالك وهو محتاج زيزو".
وعن تجديد عقده مع الزمالك، قال: "مواقفي السابقة بينت حبي للزمالك لكن ماحدش كلمني ولا فتح معايا موضوع التجديد وده غصب عنهم هما عشمانين إن زيزو قاعد معاهم وأنا قاعد طبعا وممدوح عباس ماقعدش معايا كل ده كلام سوشيال ميديا".
في سياق آخر ، علن نادي الزمالك، عن تجديد عقد محمد صبحي، حارس مرمى الفريق الأول لكرة القدم بالنادي، لمدة أربعة مواسم بداية من الموسم المقبل.
نشر "الزمالك" صورة للاعب عبر صفحته الرسمية على موقع التواصل الاجتماعي "فيس بوك"، معلقا: "الزمالك يعلن تجديد عقد محمد صبحي لمدة 4 سنوات".
ووقع اللاعب على عقود التجديد لـ نادي الزمالك فى جلسة جمعته بكل من حسين السيد عضوي مجلس الإدارة، وعبد الواحد السيد مدير الكرة بالنادي.
وكان مسؤولو الزمالك توصلوا لاتفاق مع الحارس على كافة التفاصيل الخاصة بتجديد عقده خلال الأيام القليلة الماضية ليوقع محمد صبحي رسمياً على عقود التجديد للقلعة البيضاء.