تجربة.. مصطفى مدبولي يفسر سبب وقف تخفيف الأحمال اليوم الثلاثاء
علق الدكتور مصطفى مدبولي، رئيس مجلس الوزراء، على أنباء صدور قرار من الحكومة بوقف خطة تخفيف الأحمال بداية من اليوم، مفسرا سبب وقف تخفيف الأحمال اليوم الثلاثاء.
فسر "مدبولي" خلال المؤتمر الصحفي الذي أقيم اليوم، سبب وقف تخفيف الأحمال اليوم الثلاثاء، وقال: "مكناش ناويين نعلن عن هذا الموضوع، لكن اللي حصل إن أنا طلبت وكلفت السادة الوزراء في سبيل إن إحنا نصل للمستهدف اللي هو زي ما قولنا الأسبوع التالت من يوليو نبدأ نجري تجارب على الأرض".
تابع: "لو أنا وقفت قطع الكهربا، احتياجاتي اليومية الحقيقية والدقيقة للوقود قد إيه، علشان نبقى محهزين، إحنا أعلنا عن تجهيز شحنات وقولنا إن الشحنات دي علشان نعدي بيها الصيف وهي تصل تباعا".
استكمل: "اللي طلبته إن خلينا نجرب ونشوف أقصى حمل النهاردة في ضوء يوم عادي زي ده، هيبقى لو وقفنا تخفيف الأحمال، هيبقى انتهى اليوم باستهلاك قد إيه وقود، فيه تقديرات والأرقام قالتها الكهربا والبترول، لكن حبينا نشوفها على الطبيعة علشان نتأكد بتجربة عينية على الأرض وواقعية، فعلا حجم الاستهلاك النهاردة قد إيه علشان نبقى بانيين لما بنقول هنطلع اعتبارا من الأسبوع التالت من يوليو ونقول فصل الصيف هنوقف فيه قطع الكهربا يبقى بالظبط مأمنين بالطن الاحتياجات بتاعتنا".
اختتم: "فعلشان كده بدأت هذه التجربة النهاردة لكن مش معنى كده إن إحنا وقفنا اعتبارا من النهاردة ده اللي أنا بأكد عليه لكن النهاردة كانت فعلا تجربة واقعية على الأرض علشان نقيس بالظبط احتياجات الدولة إيه علشان لما إن شاء الله نطلع من الأسبوع التالت من يوليو نبقى مطمئنين إن فترة الصيف هنبقى قادرين على تجاوزها بدون أي مفاجآت".