شهد سعيد: تأهلت للأولمبياد قبل واقعة جنة عليوة
ردت شهد سعيد لاعبة منتخب مصر للدراجات، على الجدل الذي أثير مؤخرا بشأن اعتدائها على لاعبة الدراجات جنة عليوة، مؤكدة أنها لم تتعمد إسقاطها.
قالت "سعيد" خلال مداخلة هاتفية في قناة "mbc مصر": "جنة بتقول إني شتمتها وإني خبطها كل ده مش موجود، لو أنا عملت كده ليه الحكم مدانيش إنذار أو حذرني، أنا اشتكيت للحكم من أختها أنها عايزة توقعني والحكم أدى أختها 4 إنذارات".
أشارت: "السباق كان 50 كيلو واللي حصل كان في آخر 50 متر أنا هسيب طول الـ 50 كيلو وأوقعها قدام الجمهور والكاميرا، لو أنا عايزة أأذيها كان ممكن أأذيها قدام.. أنا مفيش بيني وبينها حاجة أو عداوة بطولة الجمهورية مش مؤهلة للأولمبياد عشان أعمل كده وحتى لو مؤهلة عمري ما أأذي بني آدم".
أضافت: "أنا غلطانة بس من غير قصد، مفيش أي خلافات بينا، أنا معرفهاش، أختها عارفاني كويس، أنا تأهلت لأولمبياد باريس بتاريخ 15 أبريل 2024، والحادثة كانت يوم 28 أبريل 2024.. يعني بعد النتيجة".
أوضحت: "روحت القسم بعد الحادثة، وطلعنا الدور الرابع أنا وجنة وهي رفضت الصلح وقالتلي هحبسك، وجيت اعتذرلها وأبوس على دماغها زقتني وقالتلي ابعدي أنا مش قابلة اعتذارك ولازم تتحبسي لأنك مجرمة.. جنة بتقول المحضر شغال لسه، لكن اللي أعرفه أنه أتقفل.. ويوم ما كنا في القسم كانت بتحكي الواقعة بالتفصيل رغم أنها قالت إن عندها فقدان في الذاكرة".