معالجتوش.. رامي جمال يكشف تطورات إصابته بالبهاق
شارك الفنان رامي جمال، الجمهور بمقطع فيديو تحدث فيه عن تجربته مع مرض البهاق، وذلك بعدما وردته العديد من التساؤلات بشأن العلاج.
قال "جمال" خلال مقطع فيديو نشره عبر حسابه على تطبيق "تيك توك": "أنا معالجتوش.. بس اتعالجت نفسيا منه، دعمكوا لما اتكلمت في القصة
واتفاجئت إن انتوا أهلي وصحابي وزمايلي في الوسط الفني وكل الناس دعمتوني وخليتوني شايف إن الموضوع ده طلع ميزة مش عيب".
تابع: "أنا البهاق ايديا مليانة في كل حتة في جسمي، زمان لما كان بيبقى في نقطة صغنونة كنت بقعد أراقبها وببقى حزين جدا وزعلان وزي ما حكيت قبل كده إن كان في أشخاص زمان مبقتش تسلم والحاجات اللي مبقتش تفرق معايا نفسيا".
أضاف: "البهاق مرض مناعي، ومفيش في العلم لسه علاج نهائي له، في دكاترة في مصر بتدي علاج مؤقت، أنا مقدرش أقولكم اسمعوا كلامهم كل واحد حر في تجربته".
فيما وجه رسالة لكل أم يعاني طفلها من هذا المرض، قائلا: "عاوز أقول لكل ام عندها ابن صغير عنده بهاق، هو مش مشكلة، انتي وظيفتك تربي دلوقتي ولد عنده ميزة ربنا مميزه بيها، حاولي تقنعي بيها صحابه المقربين جدا الاولاد اللي في سنه الأذكياء إن دي حاجة كان نفسهم تبقى عندهم.. ادعميه قادر ربنا يشفيه بس احتمال إن الموضوع يكبر في جسمه، انا بغني والشكل جزء كبير فيها بس بسبب دعموا بقيت شايف ان ده مش مشكلة، ميهمناش الناس اللي شايفة ان ده عيب، ربنا يدي الناس القوة على تقبل الابتلاءات".
في نفس السياق، قال: "لو لقيتي واحد دي مشكلته سيبه متتجوزيهوش، وبعدين ربنا ميزك.. لون قلبك بان على لون جلدك، اللي عايز ياخد بنت أصول مبيدورش على مشاكلها، الأولاد اللي بيقولي عاملي مشكلة في الشغل، احنا في زمن لو كتبت بوست عن المكان اللي مشاك بسبب الموضوع ده، أعتقد المكان ده ممكن يرجعك مدير بدعم الناس ليك، احنا مبقيناش ضعاف، السوشيال ميديا ليها ميزة إن مع أول مشكلة حقيقية احنا احلى شعب وأطيب شعب هتلاقي الناس كلها في ضهرك".
اختتم حديثه: "هو حاجة ربنا اختارها ملهاش علاج واضح لحد دلوقتي، عيشوا معاها، اتبسطوا بالي عندكم احنا ابتلائنا أخف كتير من ابتلاءات الناس التانية، حبوا نعم ربنا في حبة الألوان اللي مديهالنا انتوا مميزين، أنا بقيت سعيد، انتوا حررتوني من تكتيفة، كنت بقعد أبص على إيدي كانت الأول بتبقى نقطة دلوقتي كتر جدا.. خريطة ومش شايفها، انا مفيش دوا معين خدته، لسه البهاق موجود وبالعكس زاد بس قلبي خف".