كتب وصيته قبل شهرين .. الفنانون يرثون تامر ضيائي

رحل عن عالمنا قبل قليل، الفنان تامر ضيائي، بعد صراع مع المرض.

وصية الفنان تامر ضيائي

جاء ذلك بعد أسابيع من نشر وصيته عبر حسابه الشخصي على موقع "فيسبوك"، وتضمنت الآتي:

بوست وصية ده هيفضل باين علي صفحتي لحد ما أموت..

الحقيقة اللي كلنا عارفينها ومتأكدين منها إننا كلنا ربنا كتب لنا إننا نموت في ميعاد محدد غير معروف، وعشان كده كتبت الكلام ده لأني محتاج حاجات معينه تتعمل وحاجات خايف تتعمل وأنا مش عايز حد يعملها لمجرد إنها معروفة، ووقتها طبعاً مش هعرف أقولها لحد.. ودي وصيتي:

١) صلاة الجنازة أهم من العزا وهى اللى كل ما العدد زاد كل ما ثوابي ما كان أكتر، فأرجوكم تصلوا عليا.

٢) مش شرط تيجي العزا ويا ريت لو اتعمل في البيت أو مكان بسيط بفلوسه تطلعولي صدقة جارية أفضل.

٣) من فضلكم لم يثبت أو يتفق عليه عمل خاتمة قرآن للمتوفى إنها هتوصله، بس مثبت إن الدعاء والصدقة بيوصلوا للميت، فرجاء دى بالذات بلاش وادعولي الوقت اللى هتقروا فيه جزء فضوا نفسكم واقعدوا ادعوا فيه.

٤) بلاش صدقة جارية تقليدية وسهله ومش مستفاد بيها يعنى المصاحف كتير في مصر أوي وكل بيت فيه كتير فممكن نحط الفلوس فى جامع بيتبني أو كرسي متحرك في مستشفى يستفادوا بيه المرضى أو دخول مياه لبيت غلابة أو بناء سقف لبيت فقراء، حاجات ناس تستفيد بيها لمدة طويلة.

٥) دي نقطة مهمة أوي بالنسبة ليا.. محدش يقول لحد بتعيط عليه ليه، ومتعيطش عشان هو بيتعذب! الكلام دة غلط، سيبوهم يعيطوا لحد ما يطلعوا كل الشعور اللى عندهم و مفيش حاجه بتقول إن العياط معناه عدم رضا بقضاء ربنا "وابيضت عيناه من الحزن فهو كظيم".

٦) أهم حاجة تانى هى الدعاء وبس والصدقة.

٧) من فضلكم تكثفوا الدعاء وقت نزول القبر وتتصدقوا بأى حاجة بنية إن ربنا يجعل قبري روضة من رياض الجنه ويثبتني عند السؤال لأن ده أهم وقت ليا ويا ريت كمان بعد ما تدفنوني تقعدوا معايا شوية ومتستعجلوش تمشوا عشان تونسوني في ليلة زي دي.

٨) الموت علينا كلنا حق وإحنا كلنا أمانات ربنا وهيردنا تاني، فالحزن على الفراق هونوه على نفسكم بالدعاء ليا عشان أبقى في سعادة لحد ما أقابلكم تاني.

٩) اللي بيحبوني يدعولي كتير عشان لو مفيش حد يدعيلي.

١٠) ودي مهمة أوي أوي أوي عاوز الكل يسامحني على أي حاجه عملتها فيه بقصد لو بدون قصد: "اللهم إن كثر موت الفجأة من حولي و كثر موت الشباب غفلة، ف يارب إن كنت أنا القادم فأحسن خاتمتي وارزقني نطق الشهادة عن الموت و يسّر طلوع روحي و هوّن عليّ سكراتي فإني أحب أن أرحل في هدوء وسكينة وطمأنينه، ولا تقبض روحي إلا وأنت راضٍ عني لكي أكون عبدا مقبولا عندك حتى أليق بلقائك العظيم وإن كان لي من العمر باقي فأغفر لي ذنوبي ومعاصي نفسي الأمّارة بالسوء وأعفو عني وأمحو لي كل ما يعرقل طريقي إليك وردّني إليك ردّاً جميلاً يارب العالمين".

نجوم الفن ينعون تامر ضيائي

نبأ وفاة الفنان تامر ضيائي، كان بمثابة صدمة كبيرة لأصدقائه ومحبيه، الذين أعربوا عن حزنهم الشديد.

محمد علي رزق،

كتب الفنان محمد علي زرق، عبر حسابه على "فيسبوك": "لا حول ولا قوة إلا بالله، صديقي وأخويا الكبير عشرة عمري تامر ضيائي في ذمة الله.. الله يرحمك يا تامر و يجعلك من أهل الجنة و يعوضك عن تعبك في الدنيا، نسألكم قراءة الفاتحة والدعاء له بالرحمة والمغفرة".

أحمد السلكاوي

كتب الفنان أحمد السلكاوي، عبر نفس الموقع : "خبر صادم.. لا حول ولا قوة إلا بالله.. تامر ضيائي توفى إلى رحمة الله".

ميريت الحريري

كتبت الفنانة ميريت الحريري، عبر "فيسبوك": "خبر محزن وموجع.. صاحبي الغالي الفنان تامر ضيائي في ذمة الله، الله يرحمك يا تامر.. الإنسان الخلوق صاحب صاحبه.. المحترم اللي الضحكة ماكنتش بتفارقه حتى في عز أزماته، حتوحشنا يا صاحبي، إنا لله وإنا إليه راجعون".

خالد جلال

كتب المخرج خالد جلال، عبر "فيسبوك": "أحد أبنائي من دفعة (قهوة سادة) الفنان تامر ضيائي في ذمة الله.. رحمك الله يا تامر وأسكنك فسيح جناته، الحزن عميق أيها المحترم الراقي.. في جنة الرحمن إن شاء الله".

الأزمة الصحية للفنان تامر ضيائي

يشار إلى أن الفنان تامر ضيائي، قد تعرض في أبريل الماضي، لأزمة صحية نقل على إثرها إلى المستشفى، وطالب حينها متابعيه على موقع "فيسبوك" بالدعاء له بالشفاء، قائلا: "بداية جلطة.. دعواتكم".

وكان "ضيائي" قد شارك في العديد من الأعمال الفنية من بينها مسلسل "عملة نادرة"، "الصياد"، "قصر النيل"، "أفراح إبليس"، "رسايل"، "أبو العروسة"، وغيرها.